Atyraý turǵynynan 4 qap bekire balyǵy tárkilendi

ATYRAÝ. QazAqparat - Atyraýda polıtsııa qyzmetkerleri qala mańyndaǵy Jumysker kentiniń turǵynynan 4 qapqa salynǵan bekire tuqymdas balyqty tárkiledi, dep habarlaıdy QazAqparat.

Oblystyq polıtsııa departamenti qyzmetkerleri tárkilengen 4 qaptaǵy balyqty kýágerlerdiń kózinshe ólshedi. Tárkilengen baǵaly bekire tuqymdas balyqtyń salmaǵy – 126 keli.

«Tártip saqshylary balyqty qala mańynda ornalasqan Jumysker kentiniń 1988 jylǵy turǵynynan taýyp, tárkiledi. Sotqa deıingi tergep-tekserý Qazaqstan Respýblıkasy Qylmystyq kodekstiń 339-babynyń 1-bóligimen (janýarlardyń sırek kezdesetin jáne quryp ketý qaýpi tóngen, sondaı-aq, paıdalanýǵa tyıym salynǵan túrlerimen zańsyz aınalysý) júrgizilýde», dep habarlady Atyraý oblystyq polıtsııa departamentiniń baspasóz qyzmeti.

«Bekire» aktsııasyn ótkizý kezinde tabıǵatty qorǵaý zańnamasyn buzýǵa qatysty 700-deı fakti anyqtalyp, zańsyz aýlanǵan 6 tonnadan astam balyq ónimderi, quqyq buzýshylardan 10 qaıyq tárkilenip, aıypturaqqa jetkizilgen.

Polıtsııa qyzmetkerleri tárkilengen bekire balyǵyn «Jaıyq-Atyraý» bekire balyǵyn ósirý zaýytyna ótkizdi.