Atyraý turǵyny Jaıyq ózenindegi sýdyń jasyl túsine alańdaýshylyq bildirdi
Atyraý qalasynyń turǵyny Artýr Zaınýllın áleýmettik jelige Jaıyq ózeniniń jaǵalaýyndaǵy ahýal týraly vıdeo júktedi. Onyń aıtýynsha, ózen sýy jasyl túske boıalǵan.
«Búgin, 17 tamyz, Jaıyq ózeniniń jaǵasy. Mynaý syr ma, hımııa ma, belgisiz. Búkil jaǵalaý osyndaı. Búgin tańerteń Jaıyǵyma túse almadym. Bul ne bolýy múmkin? Bul – baldyr emes. Birtúrli syr sııaqty, hımııa sııaqty», -deıdi Artýr Zınýllın jelidegi paraqshasynda.
Osy derekke baılanysty oblystyq Ekologııa departamentiniń baspasóz qyzmeti Jaıyq ózeninen sý synamasy alynǵanyn málim etti.
«Áleýmettik jelige júktelgen vıdeojazbalarǵa monıtorıng júrgizildi. Departamenttiń zerthanalyq-taldama baqylaý bóliminiń mamandary Jaıyq ózeniniń Atyraý qalasyndaǵy Kókarna shaǵynaýdany tusynan sý synamasyn aldy. Synamany taldaý qorytyndysy keıin habarlanady» -dep málim etti departamenttiń baspasóz qyzmetinen.
Budan buryn Atyraý turǵyny Aslan Omarov Jaıyq ózeniniń túbinde «senbilik» ótkizgen edi.
Onyń aıtýynsha, eki saǵatta sý astynan 50 metrdeı aýmaq tazalanǵan. Nátıje adam shoshyrlyqtaı bolǵan. Sý astynan tas baılanǵan kapron tor, salmaǵy aýyr tastar, shirip ketken temirler, tsellofan, plastık qutylar shyqqan.
«Aq Jaıyǵymyzdyń túbi qoqysqa tolyp qalypty. Biz tazalaǵan qoqystar biraz jyldan beri jatyp qalǵan. Osynsha qoqysty kórip, jaǵamdy ustadym. Tabıǵatty lastap jatqanymyzǵa shoshydym. Bul – meniń qoqysym emes. Biraq, bul ózen – bizdiń Aq Jaıyǵymyz», - dep jazdy ol.