Atyraý turǵyny 13 jasar qyzdy zorlamaq boldy degen kúdikpen ustaldy
Oblystyq polıtsııa departamentiniń baspasóz qyzmeti bul derekti rastady. Er adam Atyraý qalasyndaǵy «Avangard» shaǵyn aýdanynda ustalǵan.
«Er adam «Reno Duster» kóligin zańsyz basqaryp ketip, kópqabatty úılerdiń aýlasyna toqtaǵan. Kólik salonynda 13 jastaǵy jasóspirim qyzdy zorlaýǵa oqtalǵan. Atyraý qalalyq polıtsııa basqarmasynyń patrýldik polıtsııa batalony qyzmetkerleriniń jedel áreketiniń nátıjesinde kúdikti ustaldy», -dep habarlady.
Qazir 34 jastaǵy kúdiktige qatysty QR Qylmystyq kodeksiniń 120-babynyń 4 bóligimen, ıaǵnı jasóspirimdi zorlaýǵa oqtalý deregimen sotqa deıingi tergeý bastaldy. Kúdikti tergeý ızolıatoryna qamaýǵa alyndy. Ózge aqparat QR Qylmystyq-protsestik kodeksiniń 201-babyna sáıkes jarııalaýǵa jatpaıdy.
Eske sala ketelik, budan buryn Atyraý oblysynyń polıtseıleri izdeýde júrgen 80 qylmyskerdi ustaǵanyn habarlaǵan bolatynbyz.
Oblystyq polıtsııa departamentiniń qyzmetkerleri ótken jyldardan beri tergeý, anyqtaý jáne sot organdarymen birlese izdeý salynǵan 113 qylmyskerdi ustaý úshin jedel-profılaktıkalyq is-sharalardy júrgizip keledi.
Bıylǵy jyl basynan beri izdeýde júrgen 80 kúdikti ustalǵan. Al, 33 qylmyskerdi izdeý áli jalǵasyp jatyr.