Atyraý turǵyny 100-den astam aıyppuly bar kólikti satyp alǵan

ATYRAÝ. QazAqparat – Atyraý turǵyny 3 mln teńgege jýyq aıyppuly tólenbegen kólikti satyp alǵan, dep habarlaıdy QazAqparat.

Oblystyq polıtsııa departamentiniń málimetinshe, Grýzııa Respýblıkasynda tirkelgen kóliktiń tólenbegen 106 aıyppuly bary anyqtalǵan.

«Atyraý qalalyq polıtsııa basqarmasy jedel basqarý ortalyǵynyń qyzmetkerleri 6 maýsym kúni saǵat 12:00 shamasynda patrýldik polıtsııa qyzmetkerlerine «Toyota Highlander» avtokóligin toqtatý týraly baǵyttama berdi. Polıtsııa ınspektorlary toqtatqan kóliktiń rýlinde 1998 jyly týǵan júrgizýshi boldy. Grýzııa Respýblıkasynda tirkelgen bul kóliktiń 2 mln 937 myń 417 teńge kóleminde tólenbegen 106 aıyppuly bary, saqtandyrý júıesinde aqparat tirkelmegeni anyqtaldy», - dep habarlady departamenttiń baspasóz qyzmetinen.

Osyǵan baılanysty avtokólik ıesine QR Ákimshilik quqyqbuzýshylyq týraly kodeksiniń 230-babynyń 2-bóligimen hattama toltyryldy. Al kólik arnaýly turaqqa qoıyldy.

Kólik júrgizýshisi atalǵan kólikti 2-3 kún buryn satyp alǵanyn jáne 106 aıyppuly baryn bilmeıtinin jetkizdi.

«Turǵyndarǵa avtokólik satyp alý kezinde abaı bolýy kerek. Aldanyp qalmaý úshin satyp alatyn avtokólikti tekserý qajet. Kólik qujatynyń, tehnıkalyq jaǵdaıynyń durystyǵyn qadaǵalaýdy eskertemiz», - dep málim etti baspasóz qyzmetinen.

Eske sala ketelik, buǵan deıin Atyraýda jyl basynan beri aıyppul tóleýden jaltarǵan 500-ge jýyq júrgizýshi ustalǵanyn habarlaǵan bolatynbyz.