Atyraý turǵyndarynyń úıine ýly gazdy anyqtaıtyn datchık ornatylyp jatyr
Oblystyń tótenshe jaǵdaılar departamenti baspasóz qyzmetiniń málimetinshe, byltyrǵy qyrkúıekten beri 225 úıge osyndaı datchık ornatylǵan.
«Qazir qyzmetkerleri turǵyn úılerdegi órttiń aldyn alý úshin túsinik jumystaryn jalǵastyryp jatyr. Maqsat – qaıǵyly oqıǵalardyń aldyn alý, turǵyndardyń qaýipsizdigin qamtamasyz etý. Áleýmettik osal topqa jatatyn otbasylardyń úıine ýly gazdy anyqtaıtyn qurylǵy (datchık) ornatyldy. Sondaı-aq, datchıktiń ınstrýktsııasy kórsetildi. Ýly zattardyń ruqsat etilgen shekti kontsentratsııasynan asqan kezde datchık dybystyq dabyl shyǵarady. Bul qurylǵy avtonomdy túrde akkýmýlıatorlyq batareıamen jumys isteıdi. Batareıanyń jumys isteý merzimi bir maýsymǵa jetedi», -dep habarlady departamenttiń baspasóz qyzmeti.
Eske sala ketelik, budan buryn Atyraýda polıtseıler órtengen úıden 30-ǵa jýyq adamdy qutqarǵanyn jazǵan bolatynbyz.