Atyraý turǵyndaryn mazalaǵan jaǵymsyz ıis problemasy qalaı sheshiledi

NUR-SULTAN. QazAqparat – Atyraý qalasyndaǵy jaǵymsyz ıis problemasy qalaı sheshiledi? Bul suraqqa Ekologııa, geologııa jáne tabıǵı resýrstar mınıstri Maǵzum Myrzaǵalıev jaýap berdi, dep habarlaıdy QazAqparat tilshisi.

«Shynynda da, mundaı faktiler boldy. Mundaı jaǵdaı shilde aıynda bastaldy. Biz qorshaǵan ortanyń sapasyn kúndelikti qadaǵalap otyramyz. Eki fakt bar. Birinshiden, bul qalanyń soltústik bóliginde ornalasqan qatty qaldyqtar polıgonyndaǵy problema. Ekinshisi - «Týhlaıa balka» býlaný alańy», - dedi Maǵzum Mırzaǵalıev.

Ekologııa mınıstrliginiń basshysy bul máseleniń sheshimi - jańa polıgon salý ekenin atap ótti.

«Ákimdik jańa polıgonǵa 50 gektar jer bólip berdi, jobalyq-smetalyq qujattama jasaldy. Jaqynda ákimdik barlyq sanıtarlyq talaptarǵa saı zamanaýı polıgon salýdy bastar degen senimdemiz. Ekinshi másele - sol «Týhlaıa Balka». Ózim sonda bardym. Másele barlyq aǵyndy sýlardyń sol jaqqa tazartýsyz nemese jetkiliksiz tazalanýymen tógilýinde. Osyǵan baılanysty biz ákimdikpen birlesip jumys júrgizdik. Atyraý qalasynyń sol jaǵalaýynda kárizdi tazartatyn jańa qurylystar salynatyn ýchaske anyqtaldy. Onyń 2020 jyldyń sońynda paıdalanýǵa beriletini kútilýde. Osylaısha Atyraý qalasynda zamanǵa saı kárizdi tazartý qondyrǵy máselesi sheshiletin bolady. Sonymen qatar, kelesi jyldan bastap jergilikti atqarýshy organ - ákimdik pen Atyraý munaı óńdeý zaýyty Týhlaıa Balka býlaný alańdaryn qalpyna keltirý jumystaryn bastaıdy dep kútýdemiz», - dep túıindedi Maǵzum Mırzaǵalıev.