Atyraý turǵyndary qazaq, aǵylshyn, orys tilderin tegin úırenedi
«Til» oqý-ádistemelik ortalyǵy basshysynyń mindetin atqarýshy Laýra Ǵazızovanyń málimetinshe, Atyraý qalasynda qazaq, orys, aǵylshyn tilderin tegin oqytatyn kýrs ashylǵan. Til úıretý kýrstaryna oqýǵa 20 jastan asqan kez kelgen turǵyn tirkele alady.
Arnaıy kýrsta erkin sóıleýge deıingi til jetildirý mashyǵy oqytylady. Bul jobany oblystyq mádenıet, tilderdi damytý jáne arhıv isi basqarmasynyń qoldaýymen «Til» oqý-ádistemelik ortalyǵy júzege asyrýdy qolǵa alǵan.
«Biz Qazaqstannyń damyǵan jáne aldyńǵy qatarly órkenıetti elder qatarynda bolǵanyn qalaımyz. Bul úshin el azamattarynyń bilimge, ásirese shet tilderdi meńgerýge talpynysy bolýy kerek. Óıtkeni, qazir jańa zamannyń syn-tegeýrinderine tez beıimdelý qajettigi týyndap otyr. Osy turǵydan aıtqanda, til úıretý kýrsyn ashýdaǵy maqsatymyz – Atyraý turǵyndarynyń biliktiligin arttyrý, básekege qabiletti bolýyna jaǵdaı jasaý. Qazir bizdiń ortalyqtaǵy til úıretý kýrsynda 70-ke jýyq adam oqyp jatyr. Olardyń 80 paıyzy – jeke adamdar, al 20 paıyzy – mekemelerde jumys isteıtin qyzmetkerler. Til úırengisi keletinder bir topqa 15 adamnan bólinedi. Oqý jıiligi aptasyna bes ret dep bekitilgen. Qazaq tili kýrsy 120 saǵat oqytylady. Al, orys tili men aǵylshyn tilin oqytýǵa 80 saǵat bólinip otyr», - dep habarlady jobanyń uıymdastyrýshysy Laýra Ǵazızova.
Eske sala ketelik, buǵan deıin óńirge is-saparmen kelgen Erlan Qoshanovtyń el azamattarynyń quqyqtyq, qarjylyq saýaty áli de tómendigin aıtqanyn habarlaǵan edik.