Atyraý stýdentteri úshin 650 oryndyq jataqhana qajettigi týyndap otyr
Oblys ákiminiń orynbasary Jasulan Bısembıevtiń aıtýynsha, Atyraýdaǵy 28 oqý ornynda 28 307 stýdent billim alady. Stýdentterge arnalǵan 21 jataqhana bar.
«Atyraýda 2020-2022 jyldar aralyǵynda 810 orynǵa arnalǵan 7 stýdenttik jataqhana paıdalanýǵa berildi. Qazir ýnıversıtetter men kolledjderdi qosa alǵanda stýdentterg úshin 650 oryndyq jataqhanaǵa qajettilik týyndap otyr. Osyǵan oraı, O.Kóshekov atyndaǵy Atyraý agrarly-tehnıkalyq kolledjine 150 oryndyq jataqhana salý máselesi qarastyrylyp jatyr. Al, H.Dosmuhamedov atyndaǵy Atyraý ýnıversıtetiniń apatty jaǵdaıdaǵy №2 jataqhanasyn buzyp, jańasyn salý máselesi qozǵalyp otyr», -dep habarlady Jasulan Bısmembıev.
Onyń deregine qaraǵanda, 5 qabatty bul jataqhana 1972 jyly salynǵan. Bıylǵy qańtarda jataqhana ǵımaratynyń apattyq jaǵdaıda ekeni anyqtaldy.
«Soǵan baılanysty 560 stýdent basqa oqý oryndarynyń jataqhanasyna kóshirildi. Endi atalǵan ýnıversıtet basshylyǵy tarapynan jańadan 500 oryndyq jataqhana salý boıynsha tıisti jumys júrgizilip jatyr», -dep málim etti Jasulan Bısembıev.
Eske sala ketelik, budan buryn Atyraýda jataqhananyń qabyrǵalary jarylyp, stýdentter shuǵyl evakýatsııalanǵanyn jazǵan edik.
Ýnıversıtet basshylyǵynyń málimetinshe, sharýashylyq bólimi 2022 jyldyń qarasha aıynda №2 jataqhanadaǵy birinshi qabattyń qabyrǵasynda aqaý paıda bolǵanyn anyqtaǵan.
«Osyǵan baılanysty memlekettik satyp alý portaly arqyly jataqhananyń tehnıkalyq qaýipsizdigine saraptama júrgizýge konkýrs jarııalandy. Jeltoqsan aıynda konkýrsta jeńimpaz atanǵan «Qazkásiptik bilim» JShS atalǵan aqaýdy jóndeýge bolatyny týraly qorytyndy berdi. Ýnıversıtet tarapynan saraptamaǵa sáıkes 2023 jyldyń damý josparyna atalǵan jóndeý jumystaryn júrgizý engizildi», -dep habarlady ýnıversıtettiń basshylyǵy.