Atyraý stadıonynda fýtbol jankúıerleri tóbelesip qaldy

ATYRAÝ. QazAqparat – Búgin Atyraýda el birinshiliginiń HІV týry aıasynda «Atyraý» men «Aqtóbe» fýtbol komandalary kezdesti. Oıyn bastalǵanǵa deıin stadıonǵa jınalǵan fýtbol jankúıerleri tóbelesip qaldy, dep habarlaıdy QazAqparat tilshisi.

Bul týraly áleýmettik jelide vıdeo tarady. Oblystyq polıtsııa departamentiniń baspasóz qyzmeti jankúıerler arasynda qaqtyǵystyń bolǵanyn rastady.

«Búgin, 19 maýsym kúni saǵat 17:55 shamasynda «Atyraý-Aqtóbe» fýtbol quramalarynyń oıyny bastalmas buryn stadıon aldynda jankúıerler arasynda qaqtyǵys oryn alǵan. Polıtsııa qyzmetkerleri qoǵamdyq orynda quqyq buzýshylyqqa jol bergen 30 adamdy ustady. Olar Atyraý qalalyq polıtsııa basqarmasyna jetkizildi», -dep habarlady polıtsııa departamentiniń baspasóz qyzmeti.

Osy oqıǵa boıynsha polıtsııa qyzmetkerleri tıisti qujattardy jınaqtap jatyr.

«Áleýmettik jelide taraǵan qarý qoldanylǵany týraly aqparat shyndyqqa janaspaıdy. Jalǵan aqparatqa senbeý, resmı organnyń málimetine júginý qajettigin qaperge salamyz. Qaqtyǵys kezinde jankúıerlerdiń qolynda túrli-tústi tútin shyǵaratyn dybysy bar zat bolǵan», -dep málim etti baspasóz qyzmetinen.

Jankúıerler arasyndaǵy janjal kezinde eshkim jaraqat almaǵan.

Eske sala ketelik, buǵan deıin Atyraýda topyraq úıindisiniń astynda qalǵan eki adam qaıtys bolǵanyn habarlaǵan edik.