«Atyraý-Samara» magıstraldy qubyrymen munaı tasymaldaý úsh kúnge toqtatyldy
«QazTransOıl» AQ taratqan aqparatqa qaraǵanda, «Ózen-Atyraý-Samara» magıstraldy munaı qubyrynyń 1190,4 – 1235,4 shaqyrymynda dıametri 720 mm qubyr jańadan salynǵan.
Jalpy uzyndyǵy 45 shaqyrymdyq qubyrdyń aýystyrylǵan ýchaskelerin qosý úshin «Atyraý-Samara» ýchaskesinde munaı tasymaldaý 72 saǵatqa toqtatylǵan.
«Barlyq tehnıkalyq jumys ónerkásiptik qaýipsizdik jáne eńbekti qorǵaý talaptaryn saqtaı otyryp belgilengen merzimde oryndaldy. Munaı qubyrynyń qaıta jóndelgen ýchaskelerin qosý jumysyna «QazTransOıl» AQ Mańǵystaý, Atyraý, Aqtóbe jáne Pavlodar munaı qubyrlary basqarmalarynyń 188 qyzmetkeri, sondaı-aq «QazTransOıl» AQ paıdalaný bóliminiń, jergilikti fılıaldyń munaı tasymaldaýdy basqarý ortalyǵy bas dıspetcherlik bóliminiń qyzmetkerleri, 78 tehnıka jumyldyryldy. Jumys Reseı Federatsııasymen shekaralas aýmaqta júrgizilgendikten Atyraý munaı qubyry basqarmasy «Transneft-Prıvolga» AQ-men ýchaskeni qosý boıynsha jumys josparyn kelisip, memlekettik shekara beldeýiniń rejımin eskerdi. Arnaıy jumyskerler men tehnıkany, qural-jabdyqtardy ótkizý úshin barlyq qajetti qujattar rásimdeldi. «Ózen-Atyraý-Samara» magıstraldy munaı qubyrynyń ýchaskesin aýystyrý «QazTransOıl» AQ-nyń 2020-2024 jyldarǵa arnalǵan josparyna sáıkes júzege asyrylyp, munaıdy senimdi jáne aqaýsyz tasymaldaýdy qamtamasyz etýge baǵyttalǵan», -dep habarlady kompanııadan.
Eske sala ketelik, budan buryn Atyraý oblysyndaǵy polıpropılen óndiretin gaz-hımııa kesheniniń jumysy toqtap turǵanyn habarlaǵan bolatynbyz.