Atyraý polıtsııasy 60 adamǵa izdeý jarııalady

ATYRAÝ. QazAqparat – Atyraý oblysynyń polıtsııa departamenti 60 adamǵa izdeý jarııalady. Onyń ishinde iz-túzsiz joǵalǵan 19 adam men 41 qylmysker bar, dep habarlaıdy QazAqparat tilshisi.

Oblystyq polıtsııa departamenti krımınaldyq polıtsııa basqarmasynyń aqparatyna qaraǵanda, 19 adam iz-túzsiz joǵalyp ketken.

Onyń ishinde Atyraý qalasynan 6, Jylyoı aýdanynan 3, Maqattan – 3, Inderden – 3, Qurmanǵazy, Mahambet jáne Qyzylqoǵa aýdarynan bir-bir adamnan bar.

Túrkistan oblysynyń bir turǵynyna da izdeý salynǵan.

Inder aýdanynyń bir turǵyny 2000 jyly iz-túzsiz joǵalyp ketken.

Al, Maqat aýdanynyń 51 jastaǵy turǵyny Shymkent qalasynan byltyrǵy 1 maýsymda Dossor kentine kelmek bolǵan. Alaıda, turǵylyqty mekenjaıyna jetpegen.

Sondaı-aq, qylmys jasaǵan 41 adamǵa izdeý jarııalanyp otyr.

Qylmys jasady degen kúdikke ilingenderdiń deni – er adam. Arasynda eki áıel bar. Onyń biri 1973, ekinshisi 1997 jyly týǵan.

Іzdeýdegi kúdiktilerdiń úlkeni – 65 jasta bolsa, eń jasy – 2001 jylǵy jigit.

«Atyraý oblystyq polıtsııa departamentiniń krımınaldyq polıtsııa basqarmasymen qylmyskerler izdestirilýde. Іzdeýde júrgen azamattarǵa qatysty qandaı da bir aqparat bilseńiz, dereý polıtsııaǵa [phone] nemese 102 telefony arqyly habarlaý suralady», -dep málim etti departamenttiń baspasóz qyzmetinen.

Eske sala ketelik, budan buryn Atyraý oblysynyń polıtseıleri izdeýde júrgen 80 qylmyskerdi ustaǵanyn habarlaǵan bolatynbyz.

Atyraý oblystyq polıtsııa departamenti baspasóz qyzmetiniń málimetine súıensek, ótken jyldardan beri 113 qylmyskerge izdeý salynǵan.

Byltyrǵy qarashanyń sońyna deıin 80 kúdikti ustalǵan.