Atyraý polıtseıleri kópqabatty úıdegi órtten 15-ke jýyq adamdy evakýatsııalady

ATYRAÝ. QazAqparat – Atyraý polıtseıleri kópqabatty úıdegi órtten 15-ke jýyq adamdy evakýatsııalady, dep habarlaıdy QazAqparat.

Oblystyq polıtsııa departamenti baspasóz qyzmetiniń málimetine súıensek, 13 maýsymda patrýldik polıtsııa batalonynyń avtopatrýldeý beketiniń qyzmetkerleri, polıtsııa kapıtany Nurjan Hadımov pen polıtsııa leıtenanty Qýanysh Ábdesh kópqabatty úıden tútin shyqqanyn baıqaǵan. Keıin belgili bolǵandaı, Atyraý qalasynyń «Nursaıa» shaǵynaýdanynda №63 úıdiń 3-qabatyndaǵy páter órtengen.

«Biz kóshedegi qaýipsizdikti qadaǵalap júrip, kópqabatty úıden tútin shyqqanyn kórdik. Mundaı jaǵdaıda jedel kómek berýge umtylamyz. Biz kelgende kópqabatty úıdiń 3-qabatyndaǵy páter órtenip jatty. Úıdiń kireberisindegi 3 pen 5-qabat aralyǵyn qoıý qara tútin basyp turdy. Sol úıdiń turǵyndarymen birge 15-ke jýyq adamdy qaýipsiz jerge evakýatsııaladyq. Onyń ishinde balalar da bar», -deıdi polıtsııa kapıtany Nurjan Hadımov.

Oblystyq tótenshe jaǵdaılar departamentiniń qoǵammen baılanys tobynan málim etkendeı, órt 13 maýsym kúni saǵat 17:53-te tutanǵan.

«Kópqabatty turǵyn úıdiń 3-qabatyndaǵy páterdiń ashana bólmesi men balkony órtenip ketti. Jalyn saǵat 18:15-te oqshaýlanyp, saǵat 18:21-de tolyqtaı sóndirildi. Órtti sóndirýge departamenttiń 5 qyzmetkeri men 1 tehnıka jumyldyryldy», -dep habarlady departamenttiń qoǵammen baılanys tobynan.

Eske sala ketelik, budan buryn Atyraýda saıajaıdaǵy turǵyn úıge jylan kirip ketkenin habarlaǵan edik.