Atyraý polıtseıleri Halyq Qaharmany Ǵazız Baıtasovty eske aldy
Departament bastyǵy, polıtsııa polkovnıgi Qamza Úmbetqalıevtyń aıtýynsha, beıbit kúnde erlikpen qaza tapqan batyr polıtseı Ǵazız Baıtasovtyń esimi táýelsiz Qazaqstan tarıhynda erekshe atalary daýsyz. Ol – quqyq qorǵaý organdary qyzmetkerleriniń arasynda «Halyq qaharmany» ataǵyn alǵan alǵashqy ári jalǵyz adam.
«Budan 10 jyl buryn erjúrek polıtseı lankestiń jolyn kesip, beıbit turǵyndardyń amandyǵy úshin óz ómirin qıǵan bolatyn. Ǵazız Baıtasov osylaısha antyna berik qyzmetker ekenin tanytty. Ol mindetine adal, kózsiz erliktiń sımvoly bolyp qala beredi. Bizdiń paryzymyz – osyndaı erdiń esimin óskeleń urpaqtyń sanasyna sińirý, úlgi etip kórsetý,- deıdi departament bastyǵy, polıtsııa polkovnıgi Qamza Úmbetqalıev.
Eske salý is-sharasynda QR Ulttyq ulany «Batys» óńirlik qolbasshylyǵyna qarasty №5546 áskerı bóliminiń jas sarbazdaryna batyr polıtseı týraly beınerolık kórsetildi. Polıtsııa departamentiniń mýzeıinde qyzmet babynda qaza tapqan erjúrek batyrlar týraly jan-jaqty baıan etildi.
Departament basshylyǵy men ardagerler qyzmettik mindetin atqarý kezinde qaza bolǵandarǵa arnalǵan memorıal taqtasyna gúl shoǵyn qoıdy.
Eske sala ketelik, budan buryn Atyraý oblysynda brakonerden 400 kelige jýyq balyq tárkilengen bolatyn.