Atyraý polıtseıleri aýyzashar ýaqytynda júrgizýshilerge sý men qurma taratty
Oblystyq polıtsııa departamentiniń baspasóz qyzmetinen málim etkendeı, bul – Oraza ustaǵan jandarǵa qoldaý kórsetý.
«Jylyna bir ret keletin aılardyń sultany – Ramazan. Bul aıda adamdar bir-birine meıirimdilik tanytyp, qaıyrymdylyq kórsetedi. Bir-birimizge kórsetken janashyrlyq pen qamqorlyq eldiń yrysyn arttyrady. Atyraý qalalyq polıtsııa basqarmasy patrýldik polıtsııa batalonynyń qyzmetkerleri aýyzashar ýaqytynda kóshedegi jaıaý júrginshiler men kólik júrgizýshilerine qurma men sý taratty. Óıtkeni, jolda keptelis paıda bolýy múmkin. Ózge de sebeptermen Oraza ustaǵan jan dittegen orynǵa aýyz ashý úshin der kezinde jete almaı, keshigýi múmkin. Osyndaı sebepterdi eskergen polıtsııa qyzmetkerleri dál aýyzashar ýaqytynda sý men qurma taratý arqyly oraza ustaǵan jandarǵa qoldaý bildirdi. Sý men qurma syılaý sonshalyqty qıyn is emes. Bul – shyn kóńilden jasalǵan is. Oraza ustaǵan jandarǵa yqylasy men iltıpat kórsetý arqyly júrekterge jylý syılaý, jaqsylyq jasaýǵa sebepshi bolý artyq etpeıdi», -dep habarlady departamenttiń baspasóz qyzmeti.
Eske sala ketelik, budan buryn Atyraý polıtseıleri erekshe balanyń týǵan kúnine syılyq jasaǵany habarlanǵan edi.
Kishkentaı erekshe balaqaıdyń anasy Svetlana Lıdyń aıtýynsha, polıtsııa qyzmetkerleri Abdýrahımdy týǵan kúnimen quttyqtap, syılyq tabystaǵan.
Balaqaıdy polıtsııa kóligimen qydyrtqan.
«Balaqaıdyń qýanyshynda shek joq. Qýandy, máz boldy», -deıdi anasy Svetlana Lı.