Atyraý perzenthanasynda 3 jasqa deıingi erekshe balalardy ońaltatyn ortalyq ashyldy
«Qamqorlyq qory» QQ dırektory Araılym Erkinovanyń aıtýynsha, ortalyqta neıro-ortopedııalyq syrqaty bar 3 aıdan 3 jasqa deıingi balalarǵa keshendi ońaltý kómegi júrgiziledi.
«Qoǵamda erekshe balalardyń saýlyǵyn nyǵaıtýǵa erekshe kóńil bólinip otyr. Bul ortalyqta sondaı balalardy ońaltý úshin jańa ádister qoldanylady. Bul aýrýdy erte anyqtaýǵa, ásirese erekshe balalardy ómirge beıimdeýge oń yqpalyn tıgizedi», - dedi oblys ákimi Serik Shápkenov.
«Qamqorlyq» ataýy berilgen ortalyq medıtsınalyq, áleýmettik jáne pedagogıkalyq baǵytta jumys isteıdi. Ortalyqqa shilde aıynan bastap tserebraldy sal aýrýyna shaldyqqan, shala týý, Daýn sındromy, damýynda týa bitken aqaýy, bulshyq et dıstrofııasy, júıke júıesi buzylǵan jáne basqa da syrqaty bar balalar qabyldanady.
«Munda ár sábıdi ońaltýdyń jeke jospary jasalady. Ony nevropatologter, ońaltý dárigerleri men pedıatrlar, emdik dene shynyqtyrý nusqaýshylary, kásiptik terapevter men logopedter júzege asyrady. Ortalyqqa balalardy ońaltý úshin ozyq tehnologııalar usynylyp otyr. Bul – mehanoterapııa jáne emdik dene shynyqtyrý zaly, sensorlyq bólme, ımmersııalyq vanna, shýngıt jáne tuz bólmesi. Buǵan qosymsha estý jáne bas mıyn zertteýge arnalǵan dıagnostıkalyq jabdyqtar ornatyldy. Mundaı jabdyqtar damýdyń alǵashqy kezeńindegi buzýshylyqtardy anyqtaýǵa, soǵan sáıkes ońaltý baǵytyn ázirleýge múmkindik beredi», - deıdi Araılym Erkinova.
Eske sala ketelik, buǵan deıin elordalyq dárigerler Atyraýda bir kúnde 16 kúrdeli ota jasaǵanyn habarlaǵan edik.
Foto: Atyraý óńirlik komýnıkatsııalar qyzmeti