«Atyraý» «Ordabasydan» jeńilgennen keıin jankúıerler stadıonda shý shyǵardy
«Atyraý» komandasy fýtboldan Qazaqstan kýbogynyń toptyq kezeńinde qaıta-qaıta jeńilip júr. Sońǵy kezdesýde – «Ordabasy» komandasymen ótken matchta taǵy da jeńildi. Jergilikti komandanyń oısyraı utylýy fýtbol jankúıerleriniń narazylyǵyn týǵyzdy.
«Biz bıýdjetten bólingen qarajattyń bulaısha jelge ushqanyn qalamaımyz. Jergilikti komanda nege jeńile beredi? Bulaı jalǵasa berse, fýtbol klýby legıonerlerden «tazartylǵanyn» talap etemiz. Legıonerlerdiń ornyna jergilikti jas fýtbolshylar oınasyn. Olar árıne, jeńiske jetý úshin baryn salady. Tájirıbe jınaıdy. Bizdiń legıonerlerden quralǵan komanda emes, óz fýtbol klýbymyz bolýy kerek», - dep narazylyq bildirdi fýtbol klýbynyń jankúıerleri.
«Atyraý» fýtbol klýbynyń bas bapkeri Konstantın Gorovenko «Ordabasy» komandasymen ótken matchqa qatysty pikirin bildirdi.
«Bul oıyn biz oılaǵandaı nátıjeli bolmady. Óz alańymyzda 1:4 esebimen utyldyq. Komandanyń fýtbolshylary men jattyqtyrýshylar shtabyna oılaný kerek shyǵar. Mundaı nátıjesiz oıyn úshin jaýapkershilikti óz moınyma alamyn. Men komanda fýtbolshylaryna olardan ne kútetinimdi, qalaı oınaý qajettigin jetkize almadym. Komanda oıynshylarynda kóshbasshylyq qasıet jetispedi. Alańda jeńiske jetýge degen yntany kórmedim. Fýtboldy dál osylaı oınamaıdy», - dedi Konstantın Gorovenko.
Eske salaıyq, fýtboldan Qazaqstan kýbogynda «Atyraý» «Ordabasydan» oısyraı jeńilgeni habarlanǵan edik.