Atyraý oblysynyń tutynýshylaryna jylý úshin 7,3 mln teńge qaıta esepteledi
Tabıǵı monopolııalardy retteý komıteti Atyraý oblysy boıynsha departamentiniń málimetinshe, tabıǵı monopolııa sýbekteleriniń jylý energııasymen jabdyqtaý qyzmetiniń qunyn syrtqy aýanyń naqty temperatýrasyn eskere otyryp, qaıta esepteý boıynsha taldaý júrgizdi.
«Atyraý oblysynda ótken jylytý kezeńinde syrtqy aýanyń naqty joǵary temperatýrasynyń nátıjesinde tutynýshylarǵa 2021-2022 jylǵy jylý maýsymy boıynsha «Jylyoı Sý» MKK, «Imanalın» JK, «Qalanyń turǵyn úılerine kommýnaldyq qyzmet kórsetý» JShS, «Atyraý oblysy Sý Arnasy» KMK jáne «Atyraý jylý elektr ortalyǵy» AQ jalpy somasy 7 389 087 teńge (QQS-syz) bolatyn qaıta esepteý jasaıtyn bolady. Onyń ishinde «Atyraý jylý elektr ortalyǵy» AQ jalpyúılik jylý esepteý aspabynsyz 2 538 142,24 teńge, eski, apatty úılerde – 1 344 311,23 teńge; «Qaladaǵy turǵyn úılerge kommýnaldyq qyzmet kórsetý» JShS Nursaıa shaǵyn aýdanynda 1 490 653,1 teńge, Balyqshy kentinde 449 315,1 teńge, Juldyz shaǵyn aýdanynda 106 160,5 teńge; «Atyraý oblysy Sý Arnasy» KMK Atyraý qalasyndaǵy 1ýchaskede 192 171,6 teńge, Qurmanǵazy aýdanynda121 075,8 teńge, Isataı aýdanynda 893 113,3 teńge; «Jylyoı Sý» MKK 226 722,6 teńge; «Imanalın» JK 27 421,1 teńgeni qaıta esepteıdi. Bul – qosymsha qun salyǵyn qospaǵanda esepteletin qarjy», -dep habarlady óńirlik departamentten.
Tabıǵı monopolııalar týraly zańynyń 26-babynyń 2-tarmaǵynyń 11) tarmaqshasyna sáıkes, tabıǵı monopolııa sýbektisi syrtqy aýanyń naqty temperatýrasyn eskere otyryp, jylý energııasymen jabdyqtaý jónindegi rettelip kórsetiletin qyzmettiń qunyn tikeleı tutynýshylarǵa ne tutynýshynyń turǵan jerin anyqtaý múmkin bolmaǵan jaǵdaıda jylý energııasymen jabdyqtaý jónindegi rettelip kórsetiletin qyzmetke aqy tóleý kezinde tarıfti tómendetý jolymen qaıta esepteýdi júrgizýge mindetti.
Sondaı-aq, barlyq tutynýshynyń jalpyúılik jylý esepteý aspabyn qoldanýǵa kóshý kezinde tutynýshylar tólemderdi jylý energııasynyń naqty paıdalanǵan kólemi boıynsha júrgizedi.
Mundaı jaǵdaıda tıisinshe qaıta esepteý qajet etilmeıdi.
Eske sala ketelik, buǵan deıin Atyraýda suıytylǵan gaz saqtaý parkine 5 mln teńgege jýyq aıyppul salynǵanyn habarlaǵan bolatynbyz.