Atyraý oblysynyń medıtsına salasynda 201 dáriger jetispeıdi
Oblystyq qoǵamdyq keńestiń keńeıtilgen otyrysynda medıtsına salasyn kadrmen qamtý máselesi qaraldy.
Oblystyq densaýlyq saqtaý basqarmasynyń basshysy Ashan Baıdýálıevtiń aıtýynsha, óńirde medıtsına salasyndaǵy kadr jetispeýshiligin joıý maqsatynda birqatar jumys qolǵa alynǵan.
«Atyraý oblysynyń medıtsına salasynda 201 dáriger jetispeıdi. Aýrýhanalar men emhanalarda, ózge emdeý oryndarynda reanımatolog, akýsher-gınekolog, ınfektsıonıst, jalpy tájirıbe dárigeri, pedıatr sekildi joǵary bilimdi kadrlardyń orny bos tur. Aýyldyq jerlerdegi medıtsına mekemelerine 40 dáriger qajet», -dep málim etti basqarma basshysy Ashan Baıdýálıev.
Onyń aıtýynsha, qazir Atyraý oblysynda 6 747 medıtsına qyzmetkeri jumys isteıdi.
Onyń ishinde 1 515 dáriger, 5 232 orta býyn medıtsına qyzmetkeri turǵyndarǵa medıtsınalyq kómek kórsetip júr.
«Joǵary medıtsınalyq oqý ornyn bitirgen Atyraý oblysynyń túlekterin bilikti dáriger retinde bilimin odan ári rezıdentýrada jalǵastyrýyna jaǵdaı jasaý maqsatynda jyl saıyn 70-ten astam grant bólip otyr. Máselen, 2021 jylǵy jeltoqsanda Atyraý oblysynda Aqtóbe qalasyndaǵy M.Ospanov atyndaǵy Batys Qazaqstan medıtsınalyq ýnıversıtetiniń fılıaly ashyldy. Qazir basqa óńirlerden kelgen 35 rezıdent oblystaǵy medıtsınalyq mekemelerde jumys istep júr. Qabyldanǵan osyndaı sharalardyń nátıjesinde kadr tapshylyǵy byltyr 2020 jylmen salystyrǵanda 11%-ǵa tómendedi», -dedi Ashan Baıdýálıev.
Eske sala ketelik, budan buryn Atyraýdaǵy dárigerler dınastııasy sabaqtastyqty úshinshi býynǵa jalǵap otyrǵanyn jazǵan edik.