Atyraý oblysynyń Mahambet aýdanynda 400 oryndyq mádenıet úıi salynady
Ashat Oralov óńirge jumys sapary aıasynda Mahambet aýdanyna bardy. Aldymen, «Ónerpaz» aýdandyq mádenıet úıiniń jumysymen tanysty. Munda Batys Qazaqstan oblystyq Qadir Myrza Áli atyndaǵy mádenıet jáne óner ortalyǵynyń uıymdastyrýymen ótip jatqan «Dala dıdary» kóshpeli kontsertine qatysty.
Qazaqtyń Qadiriniń murasyn óshirmeı, kópke nasıhattap júrgen ortalyqqa alǵysym sheksiz. Ólmeıtin murany jandandyryp, kóshpeli kontsert qoıyp júrgen eńbekterińizge jemis tileımin. Atyraý oblysyna jumys saparymda mádenıet, sport nysandaryn aralap júrmin. Biz mundaı nysandardy oblys ortalyǵyna emes, aýyldyq jerde kóptep salýymyz kerek. Búgingi keshke lyq toly kórermen jınalypty. Qarasy budan kóp bolady dep oılaımyn. Sondyqtan, aýdanda halyq sanynyń ósýine baılanysty mádenıet úıin keńeıtý qajet. Men bul mekemege jańadan tehnıkalyq jabdyqtar satyp alyp berýge jáne 400 oryndyq mádenıet úıin salýǵa sheshim qabyldadym
, - dedi Ashat Oralov.
Mınıstr 1 myń oryndyq Mahambet aýdandyq balalar-jasóspirimder sport mektebine bardy. Nysan 2003 jyly salynyp, 2017-2018 jyldary kúrdeli jóndeýden ótken. Búginde boks, voleıbol, fýtbol, basketbol, jeńil atletıka, qazaq kúresi, toǵyz qumalaq, dzıýdo úıirmelerine 720 oqýshy qatysady. Munda jumys isteıtin 23 qyzmetker bolsa, onyń 9-y – jattyqtyrýshy.
Al, Inder aýdanynda «Inder-Mádenıet» aýdandyq mádenıet úıiniń jumysymen tanysyp, qyzmetkerlerimen kezdesti. Jalpy, ǵımarat 2016 jyly salynǵan. Syıymdylyǵy – 400 oryn. Munda 86 adam jumys isteıdi, onyń 55-i – mádenıet qyzmetkeri, 29-y – orkestr mamany, 31-i – tehnıkalyq qyzmetker. Sondaı-aq, dombyra jáne bı úıirmesi bar. Oǵan qosa, R. Ǵabdıev atyndaǵy halyqtyq ult aspaptar orkestri, «Arý - Ana» halyqtyq ájeler ansambli, «Aqjaıyq» halyq teatry, «Aqjaıyq» halyqtyq vokaldy aspaptar ansambli, «Asem-aı» úlgili bı ansambli, «Boıtumar» bı ansambli, «Bekzat» bı ansambli, «Atamura» aǵalar ansambli jáne «Qarlyǵash» úlgili balalar hory qurylǵan.
Inder aýdandyq jastar resýrstyq ortalyǵy ǵımaraty 1969 jyly paıdalanýǵa berilgen. 2019 jyly kúrdeli jóndeýden ótti. Munda 5 maman jumys isteıdi. Jastardyń bos ýaqytyn tıimdi paıdalanýdy uıymdastyrý maqsatynda ústel tennısi, bılıard taqtasy qoıylǵan. Oǵan qosa, «Inderbor Cinema» kınoteatry 3 seanspen kórermenderin qabyldap jatyr. Bıletterdi «Tiketon.kz» saıtynan onlaın satyp alýǵa múmkindikter qarastyrylǵan. Bılet quny balalarǵa – 500, stýdentterge – 600-800, eresekterge – 1 200-1 800 teńge. Kınoteatr 130 kórermenge arnalǵan.
Sonymen qatar, Ashat Oralov Qaroı jerindegi Mahambet Ótemisulynyń mazaryna baryp, batyrdyń árýaǵyna quran baǵyshtady.