Atyraý oblysynyń densaýlyq jáne bilim salasynda qandaı problemalar bar

ATYRAÝ. QazAqparat – Premer-Mınıstrdiń orynbasary Altaı Kólginov Atyraý oblysyndaǵy onkologııalyq dıspanser men aýyldyq mektepteriniń jumysymen tanysty, sondaı-aq Mahambet aýdanynyń turǵyndarymen kezdesti, dep habarlaıdy QazAqparat.

Óńirde densaýlyq saqtaý salasynda kadr tapshylyǵy bar. Al, oblystyq onkologııalyq dıspanserdiń ǵımaraty da, jabdyqtardyń bir bóligi de eskirgen.

Dıspanser mamandary mı isikterin, áıelderdiń reprodýktıvti syrqattaryn, basqa da aýyr dertterdi tolyq emdeýge qaýqarsyz.

Sol sebepten dıspanserge syzyqtyq údetkish, braheoterapııa apparaty, kompıýterlik tomograf kerek.

Altaı Kólginovtiń pikirinshe, oblys ákimdigi jelilik údetkishti ornalastyrýǵa qajet kanondy satyp alýǵa qarjy qarastyrýy qajet. «Qazaqstan halqyna» qorynan qymbat qural-jabdyqtarǵa qarajat bólý josparlanyp otyr.

«Onkologııa dıspanseriniń tehnıkalyq bazasyn jańartylsa, oblys turǵyndary medıtsınalyq kómekti jergilikti jerden alýǵa jol ashylady. Bul qoljetimdi ári sapaly bolady. Elimizdegi 16 onkologııalyq ortalyq «Qazaqstan halqyna» qory esebinen sáýlelik terapııa qurylǵylarymen jabdyqtalady», -dedi Altaı Kólginov.

Qazir Atyraý oblysynyń bilim salasynda 4 apatty, úsh aýysymda oqytatyn 11 mektep bar. Pedagog kadrlar tapshy, al, oqýshylarǵa oryn jetispeıdi.

Oqý-aǵartý mınıstrliginiń málimetinshe, fýnktsıonaldyq saýattylyq, akademııalyq bilim, sondaı-aq UBT nátıjesi boıynsha Atyraý oblysynyń kórsetkishi óte tómen.

Attestatsııa qorytyndysymen shekti mánnen tómen upaı jınaǵan pán muǵalimderiniń úlesi boıynsha antırekord belgilengen.

«Barlyq quraldardy paıdalanyp, oqýshylardyń bilim deńgeıin arttyrý qajet. Muǵalimderdiń kásibı deńgeıin arttyrý, oqytý ádistemesin qaıta qaraý, halyqaralyq tájirıbeni barynsha paıdalaný, sonymen qatar aýyldardaǵy ınternet jyldamdyǵyn arttyrý mańyzdy», -dep atap kórsetti Altaı Kólginov.

Altaı Kólginov óńirdegi eń iri joǵary oqý orny – H.Dosmuhamedov atyndaǵy Atyraý ýnıversıtetindegi 1000 oryndyq stýdenttik jataqhana qurylysynyń josparymen tanysty.

Al, Mahambet aýylyndaǵy D.Tólenov atyndaǵy gımnazııa 1938 jyly salynǵan úsh jeke ǵımaratta ornalasqan.

Bul ǵımarattarǵa robototehnıka men STEAM kabınetterin ornalastyrý múmkin emes.

Biraq jańa oqý jyly bastalǵanǵa deıin 600 oryndyq jańa zamanaýı ǵımarat pen 300 oryndyq mektep-ınternat salynady.

Eske sala ketelik, buǵan deıin Altaı Kólginov Atyraý oblysyndaǵy sapar ortalyǵynyń qurylysymen tanysqanyn jazǵan bolatynbyz.