Atyraý oblysynyń bilim berý salasynda jemqorlyq táýekeli joǵary

ATYRAÝ. QazAqparat – Atyraý oblysynyń bilim berý salasy sybaılas jemqorlyq táýekeli kartasyna engizildi. Buǵan saladaǵy jemqorlyq táýekeli áser etken, dep habarlaıdy QazAqparat tilshisi.

Sybaılas jemqorlyqqa qarsy is-qımyl agenttigi Atyraý oblysy boıyngsha departamenti basshysynyń birinshi orynbasary Nurlan Jahınniń aıtýynsha, bilim salasyndaǵy sybaılas jemqorlyqtyń birneshe belgisi anyqtalǵan.

«Atyraý oblysynyń bilim basqarmasyna qarasty qurylymdarda 2022-2023 jyldary jymqyrý deregi boıynsha 3 sybaılas jemqorlyq qylmysy áshkerelendi. Qazir 1 adam sot úkimimen aıypty dep tanylyp, oǵan 2 mln teńgeden astam aıyppul salyndy. Oǵan ómir boıyna memlekettik qyzmette jumys isteý quqyǵynan aıyrý jazasy taǵaıyndaldy. Bul sala sybaılas jemqorlyq táýekelderi kartasyna engizildi», -dep habarlady Nurlan Jahın.

Onyń aıtýyna qaraǵanda, sot úkimderi zerdelenip, qylmys jasaý tásilderiniń birneshe túri anyqtalǵan. Onyń ishinde BAQ ókilderine synı maqalalar jarııalamaý úshin para berý, memlekettik satyp alý rásimderin buzý deregi bar.

«Bul saladaǵy qylmystar kóp jaǵdaıda jaqyn týysqandaryn qaramaǵyna jumysqa qabyldaý, memlekettik satyp alý konkýrstary boıynsha bıýdjet qarajattaryn ysyrap etý, jumys jasamaıtyn qyzmetkerler úshin jalaqy aýdarý, oqýshylardy emtıhan synaqtarynan ótkizý, balany balabaqshaǵa qabyldaý protsedýralarynda oryn alatyny anyqtaldy», -dep málim etti Nurlan Jahın.

Eske sala ketelik, budan buryn Atyraý oblysynda 14 laýazymdy tulǵa jaýapqa tartylǵanyn habarlaǵan edik.

Atyraý oblystyq prokýratýrasynyń málimetinshe, Qurmanǵazy aýdanynda memlekettik satyp alý salasyndaǵy zańsyzdyqtar úshin 11 memlekettik mekemeniń basshysyna 1,7 mln teńge aıyppul salynǵan. Al, 14 laýazymdy tulǵa tártiptik jaýapkershilikke tartyldy.