Atyraý oblysynyń ákimi jaraqat alǵan polıtseılerdiń halin bilip qaıtty

ATYRAÝ. QazAqparat – Atyraý oblysynyń ákimi Mahambet Dosmuhambetov oblystyq aýrýhanaǵa bardy. Óńir basshysy jappaı tártipsizdikter kezinde zardap shekken polıtsııa qyzmetkerleriniń halin bildi, dep habarlaıdy QazAqparat tilshisi.

«Sońǵy málimetter boıynsha Atyraý oblystyq aýrýhanasyna túrli jaraqattarmen 62 adam júgingen. Olardyń ishinde 7-eýi statsıonarǵa jatqyzyldy. Jalpy zardap shekkenderdiń 42-si – áskerı qyzmetshiler. Qazirgi ýaqytta aýrýhanada jatqan 5 naýqastyń jaǵdaıy turaqty, quqyq qorǵaý organynyń 2 qyzmetkeriniń hali – ortasha aýyr», - dep málim etti Atyraý oblystyq aýrýhanasynyń bas dárigeri Erbol Imanǵalıev.

Eske salaıyq, Atyraý oblysynda tótenshe jaǵdaı rejımi engizildi. Komendanttyq saǵat tártibiniń oryndalýyn polıtsııa, sondaı-aq arnaıy mobıldi toptar qadaǵalaýda. Óńirde ahýal turaqty, jaǵdaı quzyrly organdardyń baqylaýyna alynǵan. Qazirgi ýaqytta densaýlyq saqtaý nysandary, balabaqshalar, azyq-túlik satatyn núkteler shtattyq rejımde jumys istep tur.