Atyraý oblysyndaǵy Teńiz ken ornynda jumysshy asylyp qalǵan

ATYRAÝ. QazAqparat – Atyraý oblysynyń Jylyoı aýdanyndaǵy Teńiz ken ornynda merdiger kompanııada eńbek etetin jumysshy sýıtsıd jasady, dep habarlaıdy QazAqparat tilshisi.

Bul derekti oblystyq polıtsııa departamentiniń baspasóz qyzmeti rastady.

Teńiz – elimizdegi eń iri ken orny. Onda qazaqstandyq kompanııalarǵa qosa, sheteldiktermen birlesken birneshe kásiporyn merdigerlik jumysqa tartylǵan. Sondaı kompanııanyń qatarynda «Senimdi qurylys» JShS bar. Atalǵan seriktestikte júzdegen adam jumys isteıdi. Seriktestiktiń bir jumysshysy 5 shildede túngi mezgilde ózine qol jumsaǵany anyqtalyp otyr.

«Bizdiń kompanııaǵa merdiger kásiporyn – «Senimdi qurylys» JShS qyzmetkerleriniń biri tirshilik belgilerinsiz tabylǵany týraly habar berildi. Bul týraly tıisti memlekettik organdarǵa der kezinde habarlandy», - dep málimdedi «Teńizshevroıl» JShS-niń baspasóz qyzmetinen.

Túngi aýysymǵa shyǵyp, jumys ornynda asylyp qalǵan jumysshynyń jasy 28-de. Onyń denesin birge jumys isteıtin áriptesteri taýyp alǵan. Jumysshynyń ózine qol jumsaýyna ne sebep bolǵany ázirge belgisiz.

Oblystyq polıtsııa departamentiniń baspasóz qyzmetinen málim etkendeı, atalǵan derekke baılanysty tekserý men tergeý amaldary bastaldy.

Eske sala ketelik, buǵan deıin Teńiz ken ornynda jarylys bolyp, eki adam qaza tapqanyn jazǵan bolatynbyz.