Atyraý oblysyndaǵy Prımorskıı kanalynda balyqtyń neden qyrylǵany tekserilip jatyr

NUR-SULTAN. QazAqparat – Prımorskıı kanalynda óli balyqtar tabyldy. Bul týraly Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń baspasóz hatshysy Sáken Dildahmet málim etti, dep habarlaıdy QazAqparat tilshisi.

«21 sáýir kúni tańǵy saǵat 7 shamasynda Prımorskıı kanaly boıynda Jaıyqqa qaraı aǵatyn salasynda óli jáne shalajansar balyqtar baıqalyp otyr. Aǵyn Jaıyqqa qaraı quıyp jatyr, balyqtar aǵynmen osylaı qaraı aǵylýda», - delingen áleýmettik jeli arqyly taralǵan vıdeoda.

Osy oraıda aqtaban men torta balyqtary anyqtaldy. Zerthanalyq zertteý sharalaryn júrgizý úshin birneshe jerde sýdyń synamasy alyndy.

Ekspress taldaý ádisimen sýda erigen ottektiń kontsentratsııasy anyqtaldy: Jaıyq ózeninde - 9,7 mg/l, Jaıyq ózeni men Prımorskıı kanalynyń toǵysqan jerinde - 3,5 mg/l, al Prımorskıı kanalynyń ortasynda 1,5 mg/l.

Belgili bolǵandaı, sý aǵyny kezinde baıqalǵan jansyz balyqtardyń basym bóligi Jaıyqqa jetkende tirilip, ózen boıymen taralyp ketti. Mamandar óli balyqty jınap aldy. Qazirgi kezde óli balyqtyń kólemi eseptelýde.

«Osy oraıda qyrylǵan balyqtan synama alynyp, veterınarlyq ınspektsııaǵa jiberildi. Balyqtyń ólýi sebebi zerthanalyq zertteýlerden keıin jarııalanady», - delingen habarlamada.