Atyraý oblysyndaǵy Oıyl ózeninde balyq qyrylyp jatyr
Balyq sharýashylyǵy komıtetiniń baspasóz qyzmetinen málim etkendeı, bul týraly keshe, 7 shildede saǵat 23:00-de aqparat túsken.
«Ózara is-qımyl shemasyna sáıkes, bul jaıt týraly barlyq múddeli memlekettik jáne jergilikti atqarýshy organǵa jedel túrde habarlandy. Osy aqparatty tekserý úshin 2023 jylǵy 8 shildede Jaıyq-Kaspıı oblysaralyq balyq sharýashylyǵy basseındik ınspektsııasynyń basshysy men orynbasary, jergilikti atqarýshy organ qyzmetkerlerinen quralǵan komıssııa balyq qyryldy degen oryndy tekserý úshin jolǵa shyqty», -dep habarlady komıtettiń baspasóz qyzmeti.
Eske sala ketelik, buǵan deıin sý tasqynyna baılanysty Atyraý oblysynda jol jyrylyp, kólik qatynasy toqtatylǵanyn jazǵan edik.
«Inder-Qarabaý-Mııaly-Saǵyz» tas jolynyń 248-260 shaqyrymynda kólik qozǵalysy shekteldi. Joldyń bul bóligi Qyzylqoǵa aýdanynyń ortalyǵy Mııaly men oǵan kórshiles Jangeldın aýylyn jalǵaıdy.
Keıin Atyraýdaǵy Naryn kanalynda balyq qyrylǵanyn habarlaǵan bolatynbyz.
Atyraý oblystyq balyq sharýashylyǵy basqarmasynyń basshysy Artýr Sádibekulynyń aıtýynsha, Naryn kanaly Isataı aýdanynda ornalasqan.
«Naryn kanalynda balyqtyń qyrylý deregi anyqtaldy. Osyǵan baılanysty arnaıy komıssııa quryldy. Komıssıa músheleri bekitilgen balyq qyrylǵan aýmaqqa baryp, tıisti algorıtmge sáıkes máseleniń mán-jaıyn zerdeleýdi bastady. Komıssııa quramynda Atyraý oblystyq balyq sharýashylyǵy basqarmasynyń, Jaıyq-Kaspıı oblysaralyq balyq sharýashylyǵy ınspektsııasy men ekologııa departamentiniń ókilderi bar», - dep habarlaǵan edi Artýr Sádibekuly.