Atyraý oblysyndaǵy mektepterde sport zaly, men ashana joq

ATYRAÝ. QazAqparat – Atyraý oblysynda 24 mektepte sport zaly, 13 bilim ordasynda ashana joq, dep habarlaıdy QazAqparat tilshisi.

Atyraý oblystyq bilim salasyndaǵy sapany qamtamasyz etý departamentiniń basshysy Berdibek Taıshevtiń aıtýyna qaraǵanda, 200 mekteptiń jańa oqý jylyna daıyndyǵyna monıtorıng júrgizilgen.

«Monıtorıng qorytyndysymen birqatar kemshiliktiń bary anyqtaldy. Máselen, 24 mektepte sport zaly joq. Al 44 mekteptegi sport zaldary sporttyq qural-jabdyqtarmen tolyq qamtylmaǵan. Atyraý qalasyndaǵy 16, Mahambet aýdanyndaǵy 7, Qurmanǵazy aýdanynyń 6 mektebindegi sport zaldarynyń jabdyqtalý deńgeıi talapqa saı emes», -dep habarlady Berdibek Taıshev.

Onyń málimetine súıensek, 13 mektepte ashana joq bolyp shyqqan. Osyndaı mektepterdiń toǵyzy Atyraý qalasynda, úsheýi Qyzylqoǵa aýdanynda, bireýi Mahambet aýdanynda ornalasqan.

«Bul Memleket basshysynyń bastaýysh synyptar oqýshylaryn ystyq tamaqpen qamtý jónindegi tapsyrmasyn oryndaýǵa keri áser etedi. Sol sebepten qazir oblystyq bilim basqarmasymen birge atalǵan máseleni oń sheshý qarastyrylyp jatyr», - dep málim etti Berdibek Taıshev.

Mektepterdi ınteraktıvti taqtamen, robot tehnıkasy kabınetimen jabdyqtaýda da kemshilik bar.

«Tekserý kezinde 57 mekteptegi ınteraktıvti taqtalardyń 50 paıyzdan astamy eskirgendikten, jumys istemeıtini anyqtalyp otyr. Óńirdegi 90 mektepte ǵana robot tehnıkasy kabıneti bar. Bul – barlyq mekteptiń 45 paıyzy. Fızıka páni boıynsha jańa úlgidegi kabınetpen 152 (76%) mektep qamtylǵan. Bilim ordalarynyń 132-si (66%) hımııa kabınetimen, 144 (72%) mektep bıologııa páni kabınetimen jabdyqtalǵan», - deıdi departament basshysy.

Sondaı-aq ınternet jyldamdyǵyna taldaý jasalǵan. Qazir 112 (56%) oqý ordasynda ınternettiń jyldamdyǵy sekýndyna 10-20 Mbıt jáne odan joǵary bolyp otyr.

Eske sala ketelik, buǵan deıin Atyraý oblysynda 6 mekteptegi jóndeý jumysy jyl sońyna deıin jalǵasatynyn habarlaǵan edik.