Atyraý oblysyndaǵy kanalda balyq qyryldy
Oblystyq balyq sharýashylyǵy basqarmasynyń basshysy Artýr Sádibekulynyń málimetinshe, Isataı aýdanynyń aýmaǵynda Naryn kanaly boıyndaǵy Aqbas (Qyztýǵan) ýchaskesiniń tusynan usaq balyqtyń qyrylǵany anyqtalǵan. Sol jerden 197 keli óli balyq jınalǵan.
«Naryn kanalynyń Janbaı aýyldyq okrýginen Aqbas ýchaskesine deıingi bóliginde sý deńgeıi tym tómendep ketken. Otteginiń jetispeýinen balyq qyryldy. Bul kanal kópten beri jóndeý kórmegendikten, arnasy eskirip, sý ótkizý múmkindigi tómendegen. Sondaı-aq, «Aqtóbe-Atyraý-Reseı Federatsııasynyń shekarasy» baǵytyndaǵy tasjolǵa kúrdeli jóndeý jumystaryn júrgizip jatqan mekemeler aınalma joldarǵa shashatyn sýdy osy kanaldan alady», - deıdi Artýr Sádibekuly.
Eske sala ketelik, buǵan deıin Atyraý oblysynda mamyr aıynan bastap qansha balyq qyrylǵanyn habarlaǵan edik.