Atyraý oblysyndaǵy eki aýylǵa aýyz sý 10 kún boıy kólikpen tasylǵan
Qurmanǵazy aýdanyndaǵy Japyryq jáne Buzaýslan aýyldarynyń turǵyndary qubyrdan sasyq ıisi bar kógergen sý júrgenine shaǵym aıtqan. Turǵyndar shaǵymy áleýmettik jelige júktelgen.
Osyǵan baılanysty Atyraý oblysy ákiminiń orynbasary Qaırat Nurtaev pen Qurmanǵazy aýdanynyń ákimi Abat Janǵalıev oqıǵa ornyna barǵan.
«Qurmanǵazy aýyldyq okrýginde Sharon ózeninen shyǵatyn Buzaýslan ózeginiń saǵasy tartylyp, sý deńgeıi tómendegen. Sý sapasynyń nasharlaýyna baılanysty bıylǵy jyldyń 5-16 tamyz aralyǵynda sý berý toqtatyldy. Alaıda, turǵyndarǵa taza aýyz sý avtokólikpen tegin tasymaldandy. Osy kezeńde turǵyndardy sapaly taza aýyz sýmen qamtý máselesi sheshilip, «Astrahan-Mańǵyshlaq» magıstraldy sý qubyrynan Qurmanǵazy aýyldyq okrýgine tıesili 2 sý tazartý qondyrǵylaryna aýyz sý berildi», -dep habarlady óńirlik kommýnıkatsııalar qyzmeti.
Qazir Qurmanǵazy aýdanyndaǵy Buzaýslan ózeginde túp tereńdetý jumysy júrgizilip jatyr. Sondaı-aq, Qurmanǵazy, Eńbekshi, Alǵa aýyldyq okrýgteri «Astrahan – Mańǵyshlaq» magıstraldy sý qubyryna qosylyp, turǵyndarǵa taza aýyz sý berilgen.
Eske sala ketelik, budan buryn Atyraý turǵyny Jaıyq ózenindegi sýdyń jasyl túsine alańdaýshylyq bildirgenin habarlaǵan edik.
Osy derekke baılanysty oblystyq Ekologııa departamentiniń baspasóz qyzmeti Jaıyq ózeninen sý synamasy alynǵanyn málim etti.
«Áleýmettik jelige júktelgen vıdeojazbalarǵa monıtorıng júrgizildi. Departamenttiń zerthanalyq-taldama baqylaý bóliminiń mamandary Jaıyq ózeniniń Atyraý qalasyndaǵy Kókarna shaǵynaýdany tusynan sý synamasyn aldy. Synamany taldaý qorytyndysy keıin habarlanady», - dep málim etti departamenttiń baspasóz qyzmetinen.