Atyraý oblysyndaǵy «Bolashaq» qondyrǵysynda «Qashaǵan» munaıyn daıyndaý toqtap tur
Kaspıı teńiziniń qazaqstandyq sektoryndaǵy «Qashaǵan» ken ornynan óndirilgen munaı qubyr arqyly «Bolashaq» keshendi qondyrǵysyna jetkiziledi. Bul qondyrǵyda munaı quramy gaz ben kúkirtten tazalanyp, eksportqa tasymaldaý úshin daıyndalady.
«Bolashaq» keshendi qondyrǵysynda «Qashaǵan» munaıyn daıyndaý protsesi 3 tamyzda toqtatyldy. Bul derekti «Qashaǵan» ken ornyn ıgerip jatqan NCOC kompanııasynyń syrtqy qarym-qatynastar bólimi rastady.
«Soltústik Kaspıı jobasynyń operatory – NCOC kompanııasy 3 tamyzda «Bolashaq» munaı men gazdy keshendi daıyndaý qondyrǵysynyń jumysy óndiris alańynda gaz ketý belgileri anyqtalýyna baılanysty qaýipsiz jolmen toqtatylǵanyn rastaıdy. Standartty protsedýralarǵa sáıkes gaz belgi berýshileriniń iske qosylýyna baılanysty qondyrǵylardaǵy qysym alaý júıesi arqyly túsirildi. Bul jaǵdaı adamdardyń densaýlyǵyna zııan keltirgen joq. Batys Eskenedegi ekologııalyq monıtorıng júrgizý stansalary lastaýshy zattardyń shekti raýaly mólsherden asqan shyǵaryndylaryn kórsetken joq. Óndiristik operatsııalardy qaıta bastaý baǵytyndaǵy jumystar jalǵasyp jatyr», - dep málim etti NCOC kompanııasynyń syrtqy qarym-qatynastar bóliminen.
Eske sala ketelik, buǵan deıin Qashaǵan ken ornyndaǵy óndiristik nysandar jumysy 45 kúnge toqtaǵanyn, keıin munaı óndirý qaıta jalǵasatynyn jazǵan edik.