Atyraý oblysyndaǵy Aqjaıyq rezervatynyń aýmaǵynda taǵy qamys órtendi

ATYRAÝ. QazAqparat – Atyraý oblysyndaǵy «Aqjaıyq» memlekettik tabıǵı rezervatynyń aýmaǵynda taǵy qamys órtendi. Oblystyq tótenshe jaǵadaılar departamenti qoǵammen baılanys tobynyń málimetinshe, órt 19 mamyrda tutanǵan, dep habarlaıdy QazAqparat tilshisi.

«Kaspıı teńiziniń jaǵalaýyna ǵaryshtan monıtorıng júrgizý kezinde 19 mamyr saǵat 16:15-te «Aqjaıyq» tabıǵı rezervatynyń aýmaǵynda órt oshaǵy tirkeldi. Rezervat qyzmetkerleriniń málimetin tekserý kezinde qamys órtiniń Atyraý qalasynan 25 shaqyrym qashyqtaǵy Kaspıı teńiziniń jaǵalaýynda tutanǵany anyqtaldy. Órttiń aýmaǵy - shamamen 5 ga», - dep habarlady departamenttiń qoǵammen baılanys toby.

Qamys órtinen eldi mekenderge qaýip tóngen joq. Órtti sóndirý úshin «Aqjaıyq» memlekettik tabıǵı rezervatynan 10 adam, 2 qaıyq, 2 motopompa tartylǵan. Keshe keshte, 19 mamyrda 3 gektar aýmaqtaǵy órt sóndirildi. Jalyndy sóndirý áli de jalǵasyp jatyr.

Bul – «Aqjaıyq» memlekettik tabıǵı rezervatynyń aýmaǵynda tirkelgen ekinshi órt. Budan buryn 21 sáýirde atalǵan rezervatta 9 ga qamys órtengen edi.

Rezervat Úkimettiń 2009 jylǵy 6 aqpandaǵy №119 qaýlysymen Jaıyq ózeniniń saǵasynda qurylǵan. 2009 jyldyń 1 sáýirinde Jaıyq ózeniniń saǵasy men Kaspıı teńizi jaǵalaýynyń aýmaǵy halyqaralyq mańyzy bar sýly-batpaqty jerler tizimine engizildi. Al, 2014 jyly atalǵan rezervat ıÝNESKO-nyń bıosferalyq rezervattarynyń dúnıejúzilik júıesine kirgen. Munda qustardyń 20, jándikterdiń 24, baýyrymen jorǵalaýshylardyń 2 túri kezdesedi.