Atyraý oblysynda jyl basynan beri jol apatynan 37 adam mert bolǵan
Atyraý oblystyq polıtsııa departamentiniń baspasóz qyzmetinen málim etkendeı, jyl basynan beri tasjoldarda 123 jol-kólik oqıǵasy tirkelgen. Jol apatynan 37 jolaýshy mert bolyp, 162 adam ártúrli dene jaraqattaryn alǵan.
«Adam ólimine ákelip soqtyrǵan jol-kólik oqıǵalarynyń basym bóligi qala syrtyndaǵy respýblıkalyq mańyzy bar tas joldarda tirkelip otyr. Jyl basynan beri osyndaı jolda 35 jol-kólik oqıǵasy tirkelip, 23 adam qaza tapty. Al, 54 adam dene jaraqatyn aldy. Qaýipsizdikti arttyryp, adam ómirin saqtaý úshin «QazAvtoJol» AQ jáne «KórkemTelekomJaıyq» JShS birlese «Aqtóbe-Atyraý-Astrahan» respýblıkalyq mańyzy bar tasjolynyń Atyraý qalasy men «Bolashaq» zaýytynyń tusyna deıingi aralyǵyna «Sergek» kamerasy ornatyldy. Óıtkeni, bul joldyń atalǵan aýmaǵynda ornalasqan eki iri zaýytqa qatynaıtyn avtokóliktiń sany eselep artyp otyr. Osy oraıda, kólik júrgizýshilerine tasjoldarda belgilengen jyldamdyq rejımin saqtap, jolda júrý erejesin buzbaýyn eskertemiz», -dep habarlady departamenttiń baspasóz qyzmeti.
Eske sala ketelik, budan buryn Atyraý oblysynda kólik aýdarylyp, sheteldik júrgizýshi men jolaýshy aýrýhanaǵa túskenin habarlaǵan bolatynbyz. Jol-kólik oqıǵasy 12 maýsymda Dossor-Qulsary-Beıneý tas jolynda bolǵan. Respýblıkalyq mańyzy bar tasjoldyń 95-shaqyrymy tusynda Chevrolet Cobalt avtokóligi aýdaryldy. Kólik rýlindegi Ózbekstan Respýblıkasynyń 2000 jylǵy azamaty basqarý júıesin ıgere almaǵany anyqtaldy. Sonyń saldarynan júrgizýshi men 1985 jyly týǵan jolaýshy túrli dene jaraqatyn aldy. Jol-kólik oqıǵasynan zardap shekken sheteldikter aýrýhanaǵa jatqyzyldy.