Atyraý oblysynda jyl basynan beri terezeden 5 bala qulap, ekeýi mert bolǵan
Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, keıingi kezde balalardyń terezeden qulaý deregi jıilegen.
«Statıstıkalyq taldaýǵa sáıkes, Atyraýda jyl saıyn terezeden qulaý saldarynan 5-6 bala kóz jumady. Máselen, bıylǵy jyl basynan beri oblysta osyndaı 5 derek tirkeldi. Onyń ishinde 2 bala kóz jumdy. Balalardyń qulaýyna plastıkalyq terezeniń ońaı ashylatyny basty sebep bolyp otyr», -dep habarlady departamenttiń qoǵammen baılanys toby.
Oblystyq departamentke qarasty tótenshe jaǵdaılardardyń aldyn alý bóliminiń bas mamany, azamattyq qorǵaý kapıtany Erbol Ǵabıtovtyń aıtýynsha, turǵyn úı terezelerine temir tor ornatý qaýipsizdikti nyǵaıta túsedi.
«Atyraý oblysynyń turǵyndary men qonaqtaryna páterdiń terezesin ashpas buryn balany qaýipsizdigine nazar aýdarý kerek. Bólmeni jeldetý úshin fortochkany ǵana ashqan jón. Balalardyń óz betimen balkonǵa shyǵýyna ruqsat bermegen durys. Tereze jaqtaýynyń tusyna jıhaz qoıýǵa bolmaıdy. Bul balanyń tereze jaqtaýyna erkin shyǵýyna jol ashady. Eń qaýiptisi – moskıtty tor. Bala oǵan súıengen kezde tormen birge qulap ketýi múmkin. Mundaı tor balanyń salmaǵyna shydamaıdy», -dep keńes berdi Erbol Ǵabıtov.
Eske sala ketelik, buǵan deıin Atyraý oblysynda terezeden qulaǵan úsh balanyń bireýi mert bolǵanyn jazǵan edik.
Onyń ishinde 2 jaǵdaı Atyraý qalasynda, bireýi Inder aýdanynda tirkelgen. Eki bala aýrýhanada emdelgen. Al, bireýi mert bolǵan.