Atyraý oblysynda jyl basynan beri 86 myńnan astam tal egildi
Oblystyq tabıǵı resýrstar jáne tabıǵat paıdalanýdy retteý basqarmasynyń basshysy Nurlan Jantoqovtyń málimetine súıensek, 48 gektar aýmaqqa tal egilgen .
«Memleket basshysy Joldaýynda 5 jylda orman qoryna 2 mlrd-tan, eldi mekenderde 15 mln-nan astam aǵash otyrǵyzýdy tapsyrdy. Bul óńirimizdegi kógaldandyrý aýqymyn keńeıtýge septigin tıgizedi. Ekologııa, geologııa jáne tabıǵı resýrstar mınıstrligimen birlesip, óńirdegi ekologııalyq ahýaldy jaqsartý baǵytynda zerdeleý jumystary júrgizildi. Birqatar keshendi sharalar qolǵa alyndy. Óıtkeni, bizdiń óńir úshin tal egý, orman qoryn molaıtý máselesi ózekti kúıinde qalyp otyr. Qazir Atyraý oblysynda memlekettik orman qorynyń kólemi – 56 myń gektar. Onyń ishinde 18 myń gektarynda orman bar», - dedi oblys ákimi Mahambet Dosmuhambetov.
Oblystyq tabıǵı resýrstar jáne tabıǵat paıdalanýdy retteý basqarmasynyń basshysy Nurlan Jantoqovtyń aıtýyna qaraǵanda, orman mekemelerinde tuqymbaqtar bar. Onda qaraǵash, shaǵan, úıeńki, jıde kóshetteri jergilikti klımatqa beıimdelip ósirilip jatyr. Byltyrdan beri Inder aýdanyndaǵy orman sharýashylyǵynyń tuqymbaǵynda alǵash ret sekseýil ósirý tájirıbesi qolǵa alynǵan.
«Óńirlik josparǵa sáıkes, kógaldandyrý jumystaryna iri munaı kompanııalaryn tartý maqsatynda memorandýmdar jasaldy. Onda kógaldandyrý jumystary 4 jyldan 10 jylǵa deıingi merzimge josparlandy. Kompanııalar bólingen ýchaskelerde qorshaý jumystaryn júrgizip, ár ýchaskege tamshylatyp sýarý júıelerin ornatyp jatyr. Olar 3 jyl boıy kóshetterdi kútip-baptap, tıisti memlekettik mekemelerge tapsyrýyna kepildik berip otyr. Aldaǵy 5 jylda 279 gektar aýmaqqa 540 myń jas kóshet egý kózdeldi. Onyń ishinde bıyl 48 gektarǵa 86 320 tal egý jospary oryndaldy»,-dedi ol.
Al, Atyraý qalasynyń ákimi Qaırat Orazbaevtyń aıtýynsha, kelesi jyly oblys ortalyǵyna qarasty eldi mekenderge 40 myń jas kóshet egý josparlanǵan.
«Jasyl jelekti demalys oryndary men saıabaqtardy kútip ustaý jumystaryn uıymdastyrýdyń algorıtmin qaıta jasaqtaý kerek. Atyraý qalasy men aýdandarda jasyl jelegi bar aýmaqtardy túgendep, qujattandyrý jumystaryn júzege asyrǵan jón. Jaıyq ózeniniń jaǵalaýyndaǵy toǵaılardy qalpyna keltirýdi erekshe baqylaýǵa alý qajet» -dep tapsyrma berdi Mahambet Dosmuhambetov.
Eske sala ketelik, buǵan deıin Atyraý oblysynda 2025 jylǵa deıin 7 mln kóshet egiletinin habarlaǵan bolatynbyz.