Atyraý oblysynda jumysshylarǵa 198,8 mln teńge jalaqy bereshege óteldi
Oblys prokýrory Halıdýlla Dáýeshovtiń aıtýynsha, bıylǵy jyldyń birinshi jartysynda 120 myńnan astam azamat pen 1,8 myń kásipkerdiń quqyǵy qorǵalǵan.
«Azamattardyń quqyqtary men bostandyǵyn, memlekettiń múddesin qorǵaý, sondaı-aq qylmystyń aldyn alý boıynsha birqatar jumys atqaryldy. Osy oraıda prokýroratýra organdary tsıfrly tehnologııalardy keńinen qoldanyp otyr», - deıdi Halıdýlla Dáýeshev.
Onyń deregine súıensek, kórsetilgen kezeńde qylmystyń deńgeıi 1,8% tómendegen. Máselen, tómendeý kórsetkishi ortasha aýyrlyqtaǵy qylmystar boıynsha 15,9%, asa aýyr qylmystardyń azaıýy 13,5% quraǵan.
«Prokýratýra qyzmetkerleri jumysshylarǵa tólenbegen jalaqy qaryzynyń ótelýine yqpal etti. Osy kezeńde 336 jumysshyǵa 198,8 mln teńgeniń jalaqy bereshegi óteldi», -dep málim etti oblys prokýrory.
H. Dáýeshev atap ótkendeı, qadaǵalaý organynyń basty basymdyǵy – azamattardyń konstıtýtsııalyq quqyǵy men memleket múddesin qorǵaý. Ásirese, sybaılas jemqorlyq, qoǵamǵa qaýip tóndiretin qylmys túrleri men balalarǵa qatysty jynystyq qylmystar, kapıtaldy zańsyz shyǵarý, «kóleńkeli» ekonomıka, alaıaqtyq pen qarjy pıramıdalarynyń jolyn kesýge baılanysty jumys jandana beredi.
«Esirtki saýdasynyń aldyn alý, qorshaǵan ortany qorǵaý men kásipkerlikti qoldaý máselelerine de basa nazar aýdarylady. El zańdylyqtarynyń saqtalýyn qadaǵalaý nazarymyzdan tys qalmaıdy», - deıdi oblys prokýrory.