Atyraý oblysynda júk poıyzy men jeńil kólik soqtyǵysyp, bir adam mert boldy
Oblystyq tótenshe jaǵdaılar departamenti qoǵammen baılanys tobynyń málimetinshe, qaıǵyly oqıǵa búgin, 13 shildede bolǵan.
Bul týraly Atyraý oblysynyń Maqat aýdanyndaǵy №8 órt sóndirý bóliminiń baılanys beketine jergilikti ýaqytpen saǵat 11:45-te habar túsken.
Maqat kentinen 20 shaqyrym qashyqtyqta temir jol ótkelinen ótpek bolǵan «Lada Granta» jeńil avtokóligi júk poıyzynyń teplovozyna soqtyǵysyp qalǵan.
«Soqtyǵysýdyń saldarynan jeńil kóliktiń 1999 jylǵy júrgizýshisiniń jaraqat alǵany anyqtaldy. Al kólikte bolǵan 54 jastaǵy jolaýshy oqıǵa ornynda kóz jumdy», -dep habarlady departamenttiń qoǵammen baılanys tobynan.
Tótenshe jaǵdaılar departamentiniń qyzmetkerleri «Holmatro» arnaıy quraly arqyly mert bolǵan adamnyń denesin shyǵarý jumystaryn júrgizdi.
Júk poıyzynyń tirkemesinde qurylys materıaldary tıelgen 66 júk vagony bolǵan.
Budan buryn Atyraý oblysynda júk poıyzy 20 qoı-eshkini basyp ketti.
Júk poıyzynyń mashınısi «Qıǵash-Atyraý» ýchaskesindegi №15 razezde temir jol ústinde júrgen qoı-eshkilerdi baıqap, shuǵyl tejeý ádisin qoldanǵan. Biraq, oqys oqıǵanyń aldyn alý múmkin bolmaǵan. Poıyz 16 qoı men 4 eshkini basyp ketti. Júk poıyzy osynyń saldarynan 12 mınýt májbúrli túrde toqtap turdy.
Keıin Atyraýda 17 jasar bozbalany teplovoz qaǵyp ketkenin jazǵan edik.
Jergilikti kolledjdiń stýdenti joldy qysqartý úshin «Qara depo» shaǵynaýdanyndaǵy temirjoldy kesip ótpek bolǵan. Jasóspirimdi «Aqjaıyq-Teńdik» temirjol ótkelinde teplovoz qaǵyp ketti. Mashınıstiń aıtýynsha, temirjol boıynda kele jatqan adamdy baıqaǵan. Alaıda, tejegishti basqanymen, teplovozdy toqtatýǵa úlgermegen.