Atyraý oblysynda joǵalǵan zeınetkerdi izdeýge kókparshylar qosyldy

ATYRAÝ. QazAqparat – Atyraý oblysynda iz-túzsiz joǵalǵan zeınetkerdi kókparshylar izdep jatyr, dep habarlaıdy QazAqparat.

Budan buryn jazǵanymyzdaı, Mahambet aýdany Beıbarys aýylynyń 65 jastaǵy turǵyny 28 qańtarda saǵat keshki 19:30-da úıinen shyǵyp, iz-túzsiz joǵalyp ketken. Onyń joǵalǵanyn týystary tótenshe jaǵdaılar departamentine 29 qańtarda saǵat 00:15-te habarlaǵan.

Keıin zeınetkerdi izdeýge 20 volonter qosylǵan edi. Alaıda, joǵalǵan er adam týraly birde-bir derek joq.

Al búgin, 2 aqpanda zeınetkerdi izdestirýge «Saraıshyq» komandasynyń kókparshylary men Beıbarys aýylynyń turǵyndary tartyldy.

«Mahambet aýdanynda 28 qańtarda joǵalyp ketken zeınetker áli tabylǵan joq. Búgin ony izdestirý is-sharasyna 64 adam, 13 tehnıka jáne «Saraıshyq» komandasynyń kókparshylary 14 jylqymen shyqty. Ázirge esh nátıje joq», - dep málim etti Tótenshe jaǵdaılar departamentiniń baspasóz qyzmetinen.