Atyraý oblysynda jer kezeginde 140 myńǵa jýyq adam tur
Oblystyq Jer qatynastary basqarmasynyń basshysy Álibek Ermekqalıdiń málimetine súıensek, óńirdegi jer qory 11 mln 863 myń gektardy quraıdy. Jer telimi ártúrli maqsatta qoldaný úshin beriledi. Alaıda, belgili bir maqsatpen bólinip, ıgerilmeı qalǵan ýchaskeler memleketke qaıtarylady.
Máselen, aldyńǵy jyly ıgerilmeı qalǵan aýylsharýashylyq maqsatyndaǵy 201 myńnan astam gektar jer anyqtalǵan. Soǵan baılanysty tıisti is-shara qoldanýdyń nátıjesinde 17 myń gektarǵa jýyq jer qaıta ıgerile bastaǵan. Al 87 myń gektarǵa jýyǵy memleket menshigine qaıtarylǵan.
«Ótken jyly oblys kóleminde 206 209 gektardy quraıtyn aýyl sharýashylyǵy maqsatyndaǵy 185 jer ýchaskesi memleket ıeligine keri qaıtaryldy. Jeri teliminiń 191 myńǵa jýyǵy jaılym bolsa, 140 gektary shabyndyq, qalǵan 15 myńy ózge maqsattaǵy sanatqa jatady. Endi bıylǵy jyl sońyna deıin paıdalanylmaı jatqan jáne zańdylyqty buza otyryp berilgen 210 myń gektar jerdi memleket menshigine qaıtarý josparlanyp otyr», - dep habarlady Álibek Ermekqalı.
Onyń aıtýynsha, Atyraý oblysynda jer alý úshin 140 myńǵa jýyq adam kezekte tur. Onyń kópshiligi Atyraý qalasynyń turǵyndary. Bıyl jeke turǵyn úı qurylysy úshin turǵyndarǵa 1 450-den astam ýchaske beriledi.
Eske sala ketelik, budan buryn Atyraý oblysynda 165 myńǵa jýyq gektar jer memleket menshigine qaıtarylǵanyn jazǵan edik.