Atyraý oblysynda jer kezeginde 138 myńnan astam adam tur
Oblystyq jer qatynastary basqarmasynyń basshysy Álibek Ermekqalıdyń málimetine súıensek, jer telimin suraýshylardyń qatary azaımaı otyr.
«Qazir Atyraý oblysynda jeke turǵyn úı salý úshin 138 myńnan astam adam jer kezeginde tur. Onyń kópshiligi – Atyraý qalasynyń turǵyndary. Munaıly shahardan 106 707 adam jer telimin alǵysy keledi. Al, aýdandardan jer telimin alýǵa 31 331 adam ótinish bergen. Máselen, Inder aýdanynda 5 978, Maqat aýdanynda – 1 294, Mahambette – 4 217, Jylyoıda – 14 041, Isataıda – 459, Qyzylqoǵada – 2 877, Qurmanǵazy aýdanynda 2 465 turǵynnyń jer telimin alýǵa bergen ótinishi tirkelgen», -dep habarlady Álibek Ermekqalı.
Onyń aıtýynsha, bıyl jeke turǵyn úı qurylysy júrgizý úshin turǵyndarǵa 1 452 ýchaske berý josparlanǵan.
Eske sala ketelik, buǵan deıin Atyraý oblysynda jer kezeginde 140 myńǵa jýyq adam turǵanyn habarlaǵan bolatynbyz.
«Ótken jyly oblys kóleminde 206 209 gektardy quraıtyn aýyl sharýashylyǵy maqsatyndaǵy 185 jer ýchaskesi memleket ıeligine keri qaıtaryldy. Jeri teliminiń 191 myńǵa jýyǵy jaıylym bolsa, 140 gektary shabyndyq, al, 15 myń gektary ózge maqsattaǵy sanatqa jatady. Endi bıylǵy jyl sońyna deıin paıdalanylmaı jatqan jáne zańsyz berilgen 210 myń gektar jerdi memleket menshigine qaıtarý josparlanyp otyr», - dep habarla edi Álibek Ermekqalı.