Atyraý oblysynda jemqorlardan alynǵan qarjyǵa 2 mektep salynady

ATYRAÝ. QazAqparat – Atyraý oblysynda jemqorlardan tárkilengen 6 mlrd teńge eki mekteptiń qurylysyna baǵyttalady, dep habarlaıdy QazAqparat.

Atyraý oblystyq Bilim basqarmasy baspasóz qyzmetiniń málimetinshe, óńirde jemqorlardan alynǵan qarjyǵa árqaısysy 600 oryndyq eki mekteptiń qurylysyn aıaqtaý kózdelip otyr. Onyń biri – munaıly shahardaǵy Aqjar-2 shaǵynaýdanynda ornalasqan orta mektep. Bilim ordasynyń qurylysyna 2,8 mlrd teńge jumsalady, Al ekinshi mektep Birlik-2 shaǵynaýdanynda salynady. Bul mekteptiń qurylysyn júrgizýge 3,2 mlrd teńgeni jaratý kózdelgen.

Budan buryn Atyraý oblysynda bıyl 25 mektep jańartylatynyn jazǵan bolatynbyz.

Oblystyq Bilim basqarmasy basshysynyń orynbasary Tilekqabyl Baıdoshevtiń aıtýynsha, mektepter jańa oqý jyly bastalǵanǵa deıin jóndeýden ótedi.

«Atyraý oblysynda 2021 jyly qala men aýdan ortalyqtaryndaǵy, aýyldardaǵy mektepterdi qaıta jańǵyrtý qolǵa alyndy. Bıyl oblysta 25 mektepte qaıta jańǵyrtý jumysy memlekettik satyp alý portaly arqyly júzege asyrylady. Bul maqsatqa bıýdjetten 800 mln teńge bólindi. Jóndeý jumystary kezinde mektepter pándik kabınettermen, jıhazben jaraqtandyrylyp, kitaphanalary men ashanalary jańartylady. Bilim ordalary qaýipsizdik júıesimen qamtylyp, oqýshylardyń ınklıýzıvti bilim alýyna múmkindik jasalady. Bul jumys oqýshylar jazǵy demalysqa shyqqan kezde bastalyp, jańa oqý jylyna deıin aıaqtaý josparlanyp otyr», - degen edi Tilekqabyl Baıdoshev.