Atyraý oblysynda jasy 100-den asqan eki ájeı úıden daýys berdi

ATYRAÝ. QazAqparat – Atyraý oblysynda jasy 100-den asqan eki keıýana úıden daýys berdi. Onyń biri Atyraý qalasynda, ekinshisi Qurmanǵazy aýdanynda turady, dep habarlaıdy QazAqparat tilshisi.

Ǵasyrdan da uzaq ǵumyr jasaǵan Balzıba Majıtova 1918 jyly dúnıege kelgen. Bıyl jasy 104-ke tolǵan. Ol soǵys jyldary tylda eńbek etip, 12 qursaq kótergen.

Qazir Atyraý qalasynda turady. Jasy ǵasyrdan asqan shaǵynda 11 shóbere, 17 jıen, 34 jıenshar, 1 shópshektiń qyzyǵyn kórip otyr.

«Bizdiń ómirimiz qıyndyqpen ótti. Asharshylyqty da, soǵysty da kórdik. Soǵystan keıingi beıbit ómirde qıraǵan sharýashylyqty qalpyna keltirýge atsalystyq. Sol qıyndyqtyń bárine tózip, moıyǵan joqpyz. Aldaǵy ómirden úmitimiz kóp edi. Búgingi táýelsiz elimizdiń jastary qıyndyqty kórmese eken. Elimizdiń táýelsizdigi máńgi, jurtymyz tynysh bolsyn», -deıdi Balzıba Majıtova.

Al, 102 jastaǵy Shámil Ómirjanova – Qurmanǵazy aýdanyndaǵy Buzaýsylan aýylynyń turǵyny.

Tyl ardageri 7 qyzy men 2 ulynan 8 nemere, 80 jıen-jıenshar, 15 shóbere súıip otyr.

«Elimizdiń irgesi berik bolsyn. Qazaqtyń jastarynyń bilimdi, ónegeli, bir-birimen tatý bolǵanyn qalaımyn. Sonda ǵana eldiń bolashaǵy jarqyn bolady», -dep batasyn berdi Shámil Ómirjanova.

Atyraý oblysynda úıden daýys berýge 773 ótinish túsken. Onyń ishinde múgedek, sozylmaly syrqaty bar, júrip-turýy qıyn qarııalar bar.

Eske sala ketelik, budan buryn Atyraýda úshinshi egizin kútip júrgen ana daýys bergenin jazǵan edik.