Atyraý oblysynda jarty jylda 25,3 mlrd teńge ıgerilmeı qalǵan
Bul týraly oblys ákimi Serik Shápkenov ótkizgen apparat jıynynda oblystyq Qarjy basqarmasy basshysynyń mindetin atqarýshy Tilekqabyl Baıdoshev málim etti.
«Oblysta jyldyq josparlanǵan qarjyny ıgerý kórsetkishi óte tómen. Jyl basynan bergi alty aıda 25 mlrd 311 mln teńge ıgerilmeı qaldy. Onyń ishinde 10 mlrd 521 mln teńge respýblıkalyq bıýdjetten transfert arqyly bólindi. Birinshi jartyjyldyqta ıgerilgen qarjynyń kólemi bar bolǵany 39,7 paıyzdy quraıdy. Birinshi jartyjyldyq boıynsha damý bıýdjetiniń ıgerilgen úlesi – 21 paıyz. Qarjynyń kóp bóligi ekinshi jartyjyldyqqa josparlanyp otyr. Buǵan maýsym aıynda respýblıkalyq bıýdjetten 40 mlrd teńge bólinip, bıýdjetti túzetý óz áserin tıgizdi», - dep málim etti Tilekqabyl Baıdoshev.
Oblys ákimi atap ótkendeı, respýblıka bıýdjetinen úlken qoldaý kórsetilip, transfetter berilip jatyr. Sol sebepti josparlanǵan jumystardy óz merziminde aıaqtaý qajet.
«Óńirge kórsetilip otyrǵan múmkindikti ońtaıly paıdalanyp, turǵyndardyń jaǵdaıyn jaqsartý úshin áleýmettik nysandar salýdy tezdetip bastaý mindeti tur. Bastaǵan isti ýaqytyly ári sapaly aıaqtaýymyz kerek. Sondyqtan, bólingen transfertke taldaý jasaý qajet. Obektıvti sebeppen ıgerilmeıtin qarajat bolsa, ony turǵyndarǵa paıdasy asatyn basqa nysandarǵa joldaý úshin qazirden usynys engizgen jón. Qurylys júrgizýge mindetteme alǵan soń, onyń sapasyn tómendetpeı, artyq shyǵynǵa jol bermeı, qatań baqylaý jasalýy tıis. Ár basshydan jaýapkershilik qatań suralady. Josparda turǵan jumystardy belgilengen merzimde aıaqtaý qajet», - dedi Serik Shápkenov.