Atyraý oblysynda jańa úlgidegi sport alańy men balabaqsha ashyldy
Jańa bóbekjaı Atyraý qalasynyń Vodnıkov eldi mekeninde boı kóterdi. 280 oryndyq nysan «Teńizshevroıl» kompanııasynyń «Igilik» baǵdarlamasy aıasynda salyndy. Endi munda aldaǵy jyly 600 oryndyq mekteptiń qurylysy bastalady.
«Oblys aýmaǵynda aldaǵy 5 jylda 50 balabaqsha salýdy josparlap otyrmyz. Bıyl óńirde 11 balabaqsha paıdalanýǵa beriledi. Sonyń biri – búgin Vodnıkov eldi mekeninde ashylǵan «Aqsuńqar» bóbekjaı-baqshasy. Munda balalarǵa mektepke deıingi tárbıe berý úshin qolaıly jaǵdaı jasalyp otyr», - dedi oblys ákimi Mahambet Dosmuhambetov.
Sondaı-aq Halyqaralyq balalardy qorǵaý kúnine oraı Atyraý oblysynda taǵy bir nysan paıdalanýǵa berildi. Inder aýdanynyń ortalyǵy – Inderbor kentindegi Sh.Ýálıhanov mektebiniń aýlasynda jańa úlgidegi sport alańy ashyldy.
Saltanatty sharaǵa aýdan ákimi, aýdandyq máslıhat hatshysy, ardager sportshy B.Aıtqalıev, sondaı-aq kent turǵyndary qatysty.
«Sport alańynyń qurylysyn «TeploInjStroı» JShS qazan aıynda bastaldy. Jalpy aýmaǵy 0,377 gektardy quraıtyn ashyq alańda fýtbol, basketbol, voleıbol, alǵashqy áskerı daıyndyq jáne Street Workout alańshasy ornalasqan. Oıyn alańdary jasandy kógalmen, jattyǵý oryndary arnaıy jabyndymen qaptaldy. Jaryq shamdary ornatyldy», - deıdi aýdan ákiminiń orynbasary A.Musaǵalıev.
Onyń aıtýynsha, mundaı sport alańdarynyń qurylysyn S.Seıfýllın, M.Áýezov, «Kóktem» qazaq orta mektepteriniń aýlasyna salý josparlanyp otyr. Qazir osy jobanyń smetalyq-qujattamasy daıyndalǵan. Qarjy bólinse, qurylys jumystary bastalady.
Eske sala ketelik, buǵan deıin Atyraý oblysynyń ákimi balalar úıindegi sábılerdiń tusaýyn kesken edi.