Atyraý oblysynda zańsyz aınalymnan 60 keliden astam esirtki tárkilengen
Oblystyq polıtsııa departamentiniń bastyǵy, polıtsııa polkovnıgi Nurhat Orazbaevtyń aıtýynsha, asa iri kólemde esirtki saqtaýdyń 17 deregi anyqtalǵan.
«Polıtsııa qyzmetkerleri asa iri kólemde esirtki saqtaýǵa qatysty 17 derekti anyqtady. Onyń ishinde sıntetıkalyq esirtki saqtaýǵa qatysty 9 derek bar. Al, marıhýanany zańsyz saqtaýdyń 3 deregi tirkeldi. Oblys aýmaǵynda esirtkiniń sıntetıkalyq túrlerin jasyryp-tyǵý ádisimen satyp júrgen adamdardyń basym bóligi – basqa óńirlerden kelgender.
Bıylǵy jyl basynan tirkelgen bul sanattaǵy qylmystardyń ishinde 8 derek Taraz, Qaraǵandy, Aqtóbe, Semeı Shyǵys Qazaqstan oblystarynan jáne Nıgerııa, Ózbekstan, Qyrǵyzstan Respýblıkalarynan kelgen tulǵalar tarapynan jasalyp otyr. Zańsyz aınalymnan jalpy salmaǵy 60 keliden astam esirtki tárkilendi», -dep málim etti Nurhat Orazbaev.
Eske sala ketelik, budan buryn Atyraýda Nıgerııa azamaty psıhotropty zattardy saqtaǵany úshin 6 jylǵa sottalǵanyn jazǵan bolatynbyz.
Sondaı-aq, Atyraýda sońǵy 2 jylda 18 myń danadan astam psıhotropty dári tárkilengenin habarlaǵan edik.
Esirtki qylmysyna qarsy is-qımyl basqarmasy men patrýldik polıtsııa batalonynyń qyzmetkerleri, ýchaskelik polıtsııa ınspektorlary 2021 jyldan beri zańsyz aınalymnan 18 myńnan astam psıhotropty dári-dármekterdi tárkilegen.
Qazir Atyraý oblysynda 500-den astam adam nashaqor esebinde tur.
Oblystyq densaýlyq saqtaý basqarmasynyń baspasóz qyzmetinen málim etkendeı, nashaqorlar esebine 508 adam alynǵan.
Onyń ishinde 68 adam esirtkilik ýyty bar tramadol dárisine táýeldi bolǵan. Qazir oblystyq psıhıkalyq densaýlyq ortalyǵynyń narkologııa bólimshesinde 75 adam tıisti emdeý sharasyn alyp jatyr. Úsh adamǵa májbúrli emdeýge jatqyzylǵan.