Atyraý oblysynda zańsyz 130 qoqys úıindisi ǵaryshtan monıtorıngileý barysynda anyqtaldy

ATYRAÝ. QazAqparat – Atyraý oblysynda ǵaryshtan túsirý arqyly ruqsat berilmegen 130 qoqys úıindisi anyqtaldy, dep habarlaıdy QazAqparat.

Oblystyq ekologııa departamenti baspasóz qyzmetinen málim etkendeı, «Qazaqstan ǵarysh sapary UK» AQ-nyń túsirilimderimen Atyraý oblysynda 130 qoqys úıindisi anyqtalyp otyr. Onyń 128-i Atyraý qalasynda bolsa, ekeýi Mahambet aýdanynyń aýmaǵynda ornalasqan.

«Osyǵan baılanysty ǵaryshtan monıtorıngileý nátıjesinde anyqtalǵan qoqys qaldyǵynyń ornyn joıý úshin arnaıy keste jasaqtaldy. Atalǵan kestege sáıkes ruqsatsazy qoqys úıindilerin joıýǵa 1 aı merzim belgilendi», - dep habarlady departamenttiń baspasóz qyzmeti.

Departament mamandary qalalyq ákimdik, polıtsııa ókilderimen birge turmys qaldyǵyn tastaǵan tulǵalardy anyqtaý maqsatynda reıd ótkizdi. Іs-shara kezinde Atyraý qalasynyń Jumysker shaǵyn aýdanynda anyqtalǵan ruqsat berilmegen qoqys oryndaryna baqylaý júrgizilip, sol aýmaqtyń turǵyndarymen kezdesý ótkizildi.

Eske sala ketelik, budan buryn Atyraý oblysynda ǵarysh túsirilimmen 484 qoqys orny anyqtalǵanyn habarlaǵan edik.