Atyraý oblysynda zamanaýı otbasylyq ambýlatorııa paıdalanýǵa berildi

ATYRAÝ. QazAqparat - Táýelsizdik kúnine tartý retinde Atyraý qalasynyń irgesindegi Aqsaı aýylynda zamanaýı úlgidegi otbasylyq ambýlatorııa ashyldy, dep habarlaıdy QazAqparat oblystyq densaýlyq saqtaý basqarmasynyń baspasóz qyzmetine silteme jasap.

52 oryndyq otbasylyq ambýlatorııanyń ashylý saltanatyna oblystyq densaýlyq saqtaý basqarmasynyń basshysy Ashan Baıdýálıev qatysty.

Ol bıyl álemdi sharpyǵan pandemııaǵa qaramastan, oblysta medıtsınalyq nysandardyń qurylysy toqtamaǵanyna toqtaldy.

Máselen, osy jyldyń ishinde Atyraý qalasynda 200 oryndyq modýldik aýrýhana, oblystyq kardıoortalyqtyń janynan qosymsha 50 oryndyq japsarjaı, 75 oryndyq Qurmanǵazy aýdandyq ortalyq aýrýhanasy, Qyzylqoǵa aýdany Saǵyz aýylynda emhana, Inder aýdany Aqqala aýylynda jáne Qyzylqoǵa aýdanynyń Qarakól aýylynda medpýnktter el ıgiligine berilgenin atap ótti.

Saltanatty sharada sóz alǵan ardager dáriger Sáýle Dáýletova aýyldyq jerden zamanaýı medıtsınalyq mekemeniń boı kóterýi – Qazaqstan táýelsizdiginiń jemisi ekendigin aıtyp, egemendik alǵanǵa deıingi qıyn shaqtaǵy dárigerler qyzmetine toqtaldy.

«Qazir oblystaǵy medıtsına mekemelerindegi ahýal aıtarlyqtaı jaqsardy, turǵyndar dárigerlik kómekke ýaqytyly júgine bastady»,- dedi ardager dáriger.

Al Aqsaı aýyldyq okrýgi ardagerler keńesiniń tóraǵasy Saıasat Rahmetov zamanaýı úlgidegi sapaly medıtsınalyq kómek kórsetetin mundaı mekemeni jerlesteriniń otyz jyl boıy armandap kelgenderin aıtty.

Atap keterligi, Aqsaı otbasylyq ambýlatorııasy «Teńizshevroıl» JShS-niń «Igilik» erikti áleýmettik-ınfraqurylym baǵdarlamasy aıasynda salyndy.

«Kompanııamyz Atyraý oblysy turǵyndarynyń basym bóligine oń áserin tıgizetin mańyzdy jobalardy qarjylandyryp keledi. Jyldyq qory 25 mıllıon AQSh dollaryn quraıtyn «Igilik» baǵdarlamasy sheńberinde kásiporyn oblysta jańa zamanaýı ǵımarattar, kóp qyzmetti emdeý mekemelerin, jan-jaqty jabdyqtalǵan mektepter men basqa da áleýmettik nysandar salýda», - deıdi «Teńizshevroıl» JShS úkimetpen jáne jurtshylyqpen baılanys bóliminiń bas menedjeri Rzabek Artyǵalıev.

Bir qatarly, aýmaǵy 558 sharshy metrlik jańa medıtsınalyq nysan Aqsaı-2 aýyldyq okrýginde ornalasqan. Endi bilikti dárigerlik kómek aýyldyq okrýgke tirkelgen 5000-ǵa jýyq adamǵa kórsetiledi.

Jańa medıtsınalyq mekemede turǵyndardy jalpy praktıka dárigerleri qabyldaıdy, ekpe, emdeý jáne aýrýdyń aldyn alý kabınetteri jumys jasaıdy.

Medıtsınalyq kómekti 3 dáriger, 9 orta medıtsına qyzmetkeri kórsetedi. Budan ózge, gınekologııa, tis dárigeri, fızıoterapııa, zerthana, oqshaýlaý, ekpe bólmeleri, jáne kúndizgi statsıonar da bar.

Eske salsaq, buryn Atyraý qalasyna qarasty Aqjar, Aqsaı, Aqsaı-2 aýyldyq okrýgynyń turǵyndary Aqjar emhanasyna qaralatyn edi.

Turǵyndar aýyldyq medmekeme ǵımaratynyń eskiligin, ári úsh birdeı aýyl turǵyndaryna tar ekenin aıtyp, shaǵymdanyp kelgen bolatyn.