Atyraý oblysynda turǵyn úı qurylysyna bólingen bıýdjetten 43 mln teńge jymqyrylmaq bolǵan

ATYRAÝ. QazAqparat – Atyraý oblysynda turǵyn úı qurylysynan 43 mln teńgeni jymqyrý táýekeli anyqtalǵan, dep habarlaıdy QazAqparat tilshisi.

Oblystyq sybaılas jemqorlyqqa qarsy is-qımyl departamentiniń basshysy Erlan Dosanovtyń málimetinshe, Maqat aýdanynda turǵyn úı qurylysynan qarjy jymqyrý táýekeli toqtamaı tur.

«Maqat aýylynda 60 páterlik 3 qabatty turǵyn úı qurylysyn salý kezinde bıýdjet qarajatyn urlaý qaýpi anyqtaldy. Maqat aýdany ákimdiginiń laýazymdy tulǵalary atqarylǵan jumystar týraly jalǵan aktige qol qoıdy. Tapsyrys berýshi tólem jasady. Alaıda, turǵyn úı qurylysyna qatysty tólem júrgizilgenmen, tıisti jumys kólemi oryndalmaǵan. Keltirilgen zalal somasy – 43 mln 165 myń teńge», - deıdi Erlan Dosanov.

Onyń aıtýyna qaraǵanda, memlekettik satyp alý boıynsha taýarlar men qyzmetterge baǵany kóterý, sybaılas jemqorlyq táýekelderine ishki taldaý júrgizýdiń formaldy deregi bar. Aýdannyń memlekettik qyzmetshileri zańnamany saqtamaıdy.

«Maqat aýdandyq jastar resýrstyq ortalyǵynyń basshysy kásipkerlik qyzmetpen aınalysqany úshin 428 820 teńge aıyppul túrindegi jazaǵa tartyldy. Laýazymdyq qyzmetterge taǵaıyndaý tájirıbesine taldaý kezinde aktıvter men mindettemeler týraly deklaratsııa usynbaǵan kandıdattar taǵaıyndalatyny anyqtaldy. Bul QR Ákimshilik quqyq buzýshylyq týraly kodeksiniń 680-babynda kózdelgen sybaılas jemqorlyqqa qarsy is-qımyl jónindegi is-sharalardyń qabyldanbaǵanyn kýálandyrady. Qazir Maqat aýdandyq sotyna Maqat aýdanynyń ishki saıasat bóliminiń basshysyn jaýapkershilikke tartý týraly materıaldar joldandy», - dep málim etti Erlan Dosanov.

Departament basshysynyń pikirinshe, bul aýdanda jol sapasy, qorshaǵan orta tazalyǵy jáne eńbek qatynastarynyń buzylýyna qatysty derekterge monıtorıng júrgizilgen.

«Bizdiń departament osyndaı problemalyq máselelerdiń oń sheshilýine basa nazar aýdaryp otyr. Osy oraıda, sybaılas jemqorlyq táýekelderiniń kartasy bekitildi. Sol sebepten, bıýdjet qarajatyn urlaýdyń aldyn alý úshin árbir nysan baqylaýymyzda bolady», - dedi Erlan Dosanov.

Eske sala ketelik, budan buryn Atyraý oblysynda mektepti jóndeý kezinde 20 mln teńgeniń jumysy atqarylmaǵanyn jazǵan edik.