Atyraý oblysynda tok soqqan 61 jastaǵy monter kóz jumdy

ATYRAÝ. QazAqparat – Atyraý oblysynda tok soqqan 61 jastaǵy monter mert boldy, dep habarlaıdy QazAqparat.

Oqıǵa keshe, 21 maýsymda Maqat aýdanynyń ortalyǵy – Maqat kentinde bolǵan.

«Atyraý-Jaryq» AQ-nyń baspasóz qyzmetinen málim etkendeı, Maqat kentindegi Alash kóshesinde ornalasqan KTPG-04/6kV jabdyǵyn profılaktıkalyq synaý-tekserý júrgizilgen.

«Sol kezde elektr monterdi RÝ-6 kV joǵary kerneýli jelisinen tok soqqan. Monterdiń elektr qaýipsizdigi boıynsha IV razrıadty ruqsat qujaty bolǵan. Oqıǵa ornyna jedel járdem shaqyryldy. Jedel járdem brıgadasy monterdiń ólimin tirkedi», -dep habarlady kásiporynnyń baspasóz qyzmeti.

Oqıǵa týraly Atyraý oblystyq memlekettik eńbek ınspektsııasyna, sondaı-aq Atom jáne energetıkalyq qadaǵalaý jáne baqylaý komıtetiniń aýmaqtyq departamentine habarlanǵan.

Osyǵan baılanysty arnaıy komıssııa qurylǵannan keıin jazataıym oqıǵaǵa qatysty tergeý júrgiziledi.

Al, oblystyq departament baspasóz qyzmetiniń málimetinshe, atalǵan derekke oraı sotqa deıingi tergeý bastalǵan.

«Maqat kentinde «Atyraý-Jaryq» AQ-nyń 1962 jylǵy qyzmetkeri jumys kezinde qaıtys bolǵany anyqtaldy. Maqat aýdandyq ishki ister bóliminiń qyzmetkerleri QR Qylmystyq Kodeksiniń 156-babynyń 3-bóligimen (Eńbekti qorǵaý qaǵıdalaryn buzý) sotqa deıingi tergeýdi júrgizip jatyr», -dep habarlady departamenttiń baspasóz qyzmeti.

Eske sala ketelik, buǵan deıin Atyraýda jol apatynan bir otbasy músheleri túgeldeı kóz jumǵanyn habarlaǵan edik.