Atyraý oblysynda terezeden qulaǵan úsh balanyń bireýi mert bolǵan

ATYRAÝ. QazAqparat – Atyraý oblysynda jyl basynan beri 3 bala terezeden qulap, 1-eýi mert bolǵan, dep habarlaıdy QazAqparat.

Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, jyl basynan beri balalardyń terezeden qulaýyna baılanysty 3 derek tirkelgen.

«Bıyl Atyraý oblysynda 3 bala terezen qulap ketti. Onyń ishinde 2 jaǵdaı - Atyraý qalasynda, bireýi - Inder aýdanynda tirkelip otyr. Eki bala aýrýhanaǵa túsip, emdelip shyqty. Ókinishke qaraı qulaǵan balanyń bireýi mert boldy. Balalardyń terezeden qulaýyna birneshe sebep bar. Birinshiden, ásirese, jaz mezgilinde turǵyndar kópqabatty úılerdiń terezesine qorǵanysh bekitkish qondyrymaıdy. Ekinshiden, ata-analar balalaryn úıde qaraýsyz qaldyrady», -dep habarlady departamenttiń qoǵammen baılanys toby.

Tótenshelikter osyndaı sebepterge baılanysty ata-analarǵa birneshe keńesti usynyp otyr.

«Birinshiden, úıde bala bolsa, terezeni ashyq kúıde qaldyrmaý qajet. Ekinshiden, úıde kishkentaı balalardy qaraýsyz qaldyrý olardyń terezeden qulaý qaýpin molaıtady. Úshinshiden, terezege ornatylǵan moskıtti torǵa eshqashan senýge bolmaıdy. Mundaı tor balalardyń salmaǵyna shydas bermeıdi. Tórtinshiden, balalardyń terezeniń jaqtaýyna shyqpaýy úshin jaqyn mańǵa jıhaz qoımaý kerek. Eń bastysy, balallardy qorǵaý úshin terezeni birneshe dıýımǵa ǵana ashýǵa múmkindik beretin arnaıy bekitkish ornatqan jón», -dep málim etti departamenttiń qoǵammen baılanys tobynan.

Eske sala ketelik, budan buryn Atyraýda 12 jasar bala Jaıyq ózenine batyp ketkenin jazǵan edik.