Atyraý oblysynda taǵy bir aýmaq munaı ónimine uqsaıtyn suıyqtyqpen búlingen

ATYRAÝ. QazAqparat – Atyraý oblysynda munaı ónimine uqsaıtyn suıyqtyqpen búlingen taǵy bir jer tabyldy. Ázirge qorshaǵan ortaǵa zııan keltirgender anyqtalǵan joq, dep habarlaıdy QazAqparat.

Atyraý oblysy boıynsha ekologııa departamentiniń málimetine súıensek, búlingen jer Maqat aýdanynyń aýmaǵynda anyqtalyp otyr.

«Áleýmettik jelidegi jazbalarǵa monıtorıng júrgizý kezinde qoǵamdyq belsendi Ǵazız Ǵabdýllınniń Facebook-tegi paraqshasyndaǵy beınejazbaǵa zerdeleýge qolǵa alyndy. Qoǵamdyq belsendi Maqat aýdanyndaǵy Dossor kentinen shamamen 15-17 shaqyrym qashyqta ornalasqan Jyńǵyldy eldi mekeniniń tusynda ken ornyn paıdalanǵannan keıin qaraýsyz qaldyryp, munaımen sol aýmaqty búldirgeni týraly beınejazba júktegen. Osyǵan oraı departament mamandary keshe, 19 qyrkúıekte atalǵan aýmaqqa Maqat aýdandyq prokýratýrasynyń, Maqat aýdany ákimdigi men Maqat aýdanynyń polıtsııa qyzmetkerlerimen birge tekserý jumystaryn júrgizdi. Tekserý kezinde Maqat aýdanynyń Dossor kentinen shamamen 15 shaqyrym qashyqtyqtaǵy ken ornynyń aýmaǵynda topyraq qabaty munaı ónimderine uqsaıtyn suıyqtyqpen búlingeni anyqtaldy», -dep málim etti ekologııa departamentiniń baspasóz qyzmetinen.

Departamenttiń zerthanalyq taldaýdy baqylaý bóliminiń mamany munaı ónimimen búlingen jerdiń topyraǵynan synama aldy.

Qazir departament mamandary ken ornynyń qaı kásiporynǵa tıesili ekenin anyqtaý jumystaryn júrgizilip jatyr.

Eske sala ketelik, buǵan deıin Atyraý oblysynda úsh jerge munaı ónimderi tárizdes suıyqtyq tógilgenin habarlaǵan bolatynbyz.