Atyraý oblysynda tabıǵı gazdan 10 adam ýlanyp, bireýi kóz jumǵan
Atyraý qalalyq tótenshe jaǵdaılar basqarmasynyń basshysy Ǵabıt Babaevtyń aıtýynsha, tabıǵı gazdan ýlaný deregi turǵyn úı sektorynda tirkelgen.
«Oblys turǵyndary arasynda oqys oqıǵalardyń aldyn alý, órt qaýipsizdigi erejelerin saqtaýǵa baılanysty úgit-nasıhat jáne túsindirý jumystary júrgizilip keledi. Soǵan qaramastan, turǵyn úı sektorynda tabıǵı gazdan ýlaný deregi qaıtalanyp otyr. Bıylǵy jyl basynan beri Atyraý oblysynda tabıǵı gazdan 10 adam ýlanyp, 1 adam qaıtys boldy. Oblystyq aýrýhanaǵa dárigerlik kómek alýǵa júgingenderdiń arasynda kámeletke tolmaǵan 5 bala bar», -deıdi Ǵabıt Babaev.
Onyń málimetine súıensek, áleýmettik turmysy tómen topqa jatatyn otbasylar turatyn 1500-ge jýyq turǵyn úı esepke alynǵan.
«Osy kezge deıin jeke sektordaǵy 85 úıge dabyl qaqqysh datchık ornatyldy. Mundaı datchık kómirqyshqyl gazy anyqtalǵan kezde jaryq pen dybystyq belgi beredi. Úı ıeleri jylytý qazandyǵynda aqaý bolmaýy úshin ýaqytyly tekserip, tútin murjalaryn jıi tazalap turýy qajet. Sonda ǵana ókinishke uryndyratyn oqys oqıǵanyń aldyn alýǵa bolady», -dep málim etti Ǵabıt Babaev.
Eske sala ketelik, buǵan deıin Atyraýda bir ottbasynyń 6 adamy gazdan ýlanyp, bireýi kóz jumǵanyn habarlaǵan edik.